United tan Liverpool an thiam mah mah!

"Europe-a champion Liverpool ka hmachhawn tawh a, he team hi chuan eng nomawi mah an la chawi lo," tiin Jose Mourinho-a'n 'tuna' Liverpool team dah sang lo mah se 'tuna' Liverpool ngam loin 3-1 in a tlawm.

Hun tawp nan minute 20 a la awm tih thlengin team pahnih hi 1-1 in inhnehtawk mah se Xherdan Shaqiri luh hnuah engkim thlak danglamin a awm a, Swiss midfielder hian goal hnih rawn khungin Liverpool chakna a ni.

Liverpool-in Premier League match 17 an khelh tawhah an la tlawm miah lo a, table chung berah awmin an hnuaia awm Manchester City aia an sanna erawh point khat chauh a la ni thung.

Reds manager Jurgen Klopp pawh a la ṭawng fimkhur a, German coach chuan, "December-ah champion a la nih theih loh," tiin hmabak tam tak an la neih thu a sawi.

United an zawr
Anfield-a inkhelah hamrik a rik ruala inkhel thununtu chu Liverpool an ni nghal a, tlarhnung lamah United an bet thlap a, Liverpool-in goal khung tumin an nawr thung.

Minute 24-naah Liverpool-in an phu ang ngeiin goal an hlawh chhuak nghal a, khel ṭha em em mai Fabinho thawhrah a ni. United player ten penalty area pawnah Brazilian midfielder hi duh thala ball petna hmun awl an siam sak a, uluk taka 'measurement' lain Mane tan a siamsak.

Napoli laka mualpho Mane-a'n mualpho nawn a tum lo. Fabinho ball thlawh luh chu a awma la thlain, lei a thlen hmain a pet leh nghal a, United keeper David de Gea tan dan hman a ni lo.

Anfield thawm a ring a, game an thunun bawk avangin Liverpool fan-ten point thum an mitthla lehnghal a nih pawhin a mak lo.

Mahse...
Liverpool-in Champions League last 16 an luh nan Napoli chu 1-0 in an hneh a, injury time-a save ropui neitu Alisson chu fak rawn a ni - Klopp-a'n, "Heti khawp hian a ṭha tih lo hria ni ila a man let ka pe duh ang," a ti.

Mahse, Alisson fakna thawm ri pawh a reh hmain Brazilian goalkeeper manto a chesual a, goal hmahruai an khung aṭanga minute kuana lekah Romelu Lukaku ball cross 'naran' tak chu a man nghet zo lo a, Jess Lingard bulah tak a tla.

England international hian rang takin a pet lut nghal a, Liverpool goal nawr mang lo United-in Alisson chetsual zarzoin si phurh an sut a, goal erawh an nawr chhunzawm thei chuang lo.

Liverpool goal chhuah danah Alisson dem theih viau mah se game pumpui thlir erawhin a thawh hlawkna hmuh hmaih theih a ni lo a, goal hlauhawm tia sawi theih dan tur nei lo mah se a ball distribution ṭha tak chu Liverpool game 'play' ti famkimtu pakhat a ni.

Super sub Shaq!
Liverpool-in second half-ah nawr chhunzawm mah se United-in goal venhim an thlan avangin hmun awl remchang an nei thei lo a, minute 20 a la awm tiha Klopp-a substitution chu inkhel thlak danglamtu a ni.

Klopp hian Naby Keita la chhuakin tlarhma lama tal nuam ti zawk Shaqiri a luhtir a, Swiss midfielder hian inkhel thlak danglam turin hun a mamawh rei lo.

Shaq hian khelmualah minute thum chauh hun a hmang hman tihin goal a rawn khung nghal a, minute 80-naah a goal hnihna a rawn khung zui bawk - kum 1994-a Nigel Clough hnua Liverpool tana United a hmachhawn hmasak bera goal hnih khung lehnghal thei hmasa ber a ni.

Reds-in an goal thumna an khung meuh chuan United tan thawh ngaihna a awm tawh lo - Liverpool hian 64% ball changin shot vawi 36 an nei a, United shot neih zat erawh vawi ruk a ni!