Palina kan la ni thei - Mourinho

Liverpool leh Man-chester City fan-ten champion an sawi laia Manchester United manager Jose Mourinho thusawi erawh, "Palina kan la ni thei," tih a ni!

Manchester United hian match 17 aṭangin point 26 an nei tawh a, 1990-91 season hnua top flight football-a heti zat match aṭanga point an hlawhchhuah tlem ber ṭum an tawng.

Mourinho chuan, "No-mawi chawi beisei chi kan ni tawh lo a, palina erawh kan la ni thei. A awlsam dawn lo tih ka hria a, parukna zingah phei chuan chiang takin kan awm ang," a ti.

United tan parukna leh palina hi lungawi chi a ni lo a, Liverpool an hneh loh hnua sawi hlawh ber chu Mourinho hi United manager a nih chhunzawm zel ang em, tih chu a ni.

Portuguese manager hian Reds lakah Paul Pogba chu bench-ah a dah tluan a, a player-te nen an inkar boruak a ṭha tawk lo nia sawi a awm lehzel bawk avangin a him lo.

Mahse, Mourinho chuan a player te nen an inkar boruak a ṭhat thu sawiin a chhan zui. Chelsea boss hlui chuan, "Ka player-te hian nitin, minute tinin an theihtawp an chhuah ziah a, khelmuala awmte khan an theihna zawng zawng an pe a, Liverpool kan tluk lo a ni," tiin a sawi.