City kan ngaihtuah rih lo - Klopp

Kar hmasa kha chuan Liverpool hmabak hautak zia chu media titi tui ber a ni. Champions League-ah chak ngei mamawh chungin Napoli an hmachhawn a ṭul a, a dawta nghaktu pawh Manchester United an ni.

Liverpool-in Napoli an hneh a, United an hneh zui a, Premier League hmahruaitu an ni bawk. Klopp tan erawh champion sawi hun a la ni lo a, Manchester City ngaihven hun lah a la ni hek lo.

Klopp chuan, "Kan dinhmun avangin ka lawm a, mahse kan inkhelh hma pawh khan City leh table chungchang engmah sawi kan nei lo. City result ngaihven hian engmah kan thlak danglam thei lo a, kan tih thei chu hnehna chan a, point hmuh zel a ni," a ti.

Liverpool leh Manchester City hi January 3-ah an intawng dawn a, an intawn hma hian Reds hian Wolves, Newcastle United leh Arsenal hmachhawn tur an la nei.

Klopp chuan, "January 3-a kan intawn hunah City chungchang chu kan la ngaihtuah ang chu," a ti!

German coach chuan United nena an inkhel thlirkir nghalin, "Kan khelh dan avangin ka lawm a, ka nauten an khelh dan kha chu a ṭha chungchuang a ni," tiin a sawi.