Arsenal tlawm zanah Chelsea an chak

Premier League nomawi inchuh boruak a dang a, season tharah Champions League khelh inchuh boruak pawh a nep chuang lo. Arsenal chu team talbuai Southampton lakah 3-2 in an tlawm laiin Chelsea chuan Brighton lakah 2-1 in hnehna an chang thung.

Pathianni zan EPL result avang hian Chelsea hian point 37 hmuin palinaah an awm chhunzawm a, hetih lai hian Gunners erawh point 34 hmuin pangana an awm. Unai Emery naute tan a sang pali zinga tel tur pawhin kawng a awlsam dawn lo.

Tlarhnung pawp

Arsenal-in hliam vangin Rob Holding, Sead Kolasinac leh Konstantinos Mavropanos te an chhawr thei lo a, Sokratis Papastathopoulos leh Shkodran Mustafi te hrem an nih bakah Hector Bellerin a hliam leh hnuhnawh bawk. Emery tan duhthlan tur a vang, captain Laurent Koscielny leh kum 34 mi Stephan Lichtsteiner te chuan a vawi khat bul an ṭan dun, inkhel chawhnu lamah Granit Xhaka tlarhnunga awm turin pawh let a ngai hial.

Southampton manager Ralph Hasenhuttl-a'n an mikhual chak lohna lai a hria a, box chhungah ball kang an vawrh nasa. Danny Ings-a'n chiang zeta ṭum hnih a tauh luh bakah Charlie Austin chuan hun tawp dawnah chakna goal a tauh lut bawk. Gunners tan Henrikh Mkhitaryan-a'n an si phurh vawi hnih zut ve mah se point hlawh chhuah nan a tawk zo lo.

Arsenal hian khel ṭha tluang viau mah se an tlarhnung an remphui theih loh an tuar a, striker Pierre Emerick Aubameyang-a'n a hun ṭha neih ṭum hnih a hloh bakah bench aṭanga dah luh Mesut Ozil chuan danglamna a siam phak lo - match 22 chhung tlawm loa an kaltluang lai chu Saints lakah a tawp.

Gunners manager Emery chuan, "Vawiin match anga hnehna kan chang lo zui zel a nih chuan kan tan palina nih phak a harsa ang. Chak loh ṭum chu a awm thei, chu hun chu kan tawng ta. Kan elpui team ten hnehna an chang zel a, hei vang hian a rang thei ang berin insiamṭhat a ngai," tiin a sawi.

Saints manager thar Ralph Hasenhuttl-a'n inkhelh banah an chak a lawm a, an mikhual manager Emery a chibai theihnghilh hial. Hasenhuttl chuan, "Hun rei lote chhunga kan zir kan lantir nghal thei khan min ti lawm, player leh fans chungah ka lawm takzet," a ti.

Blues tan Hazard

Chelsea manager Maurizio Sarri chuan Brighton laka goal a khung baka Pedro goal khung tur siamsak tu Eden Hazard a dahsang hle a, chutih rualin tun aia ṭha zawkin a la khelh theih a beisei thu a sawi.

Amex Stadium-ah kum 27 mi Hazard-a'n minute 17-na lekah Barcelona forward hlui Pedro tan hun ṭha bik a siamsak a, chawlhlawk hmain Leon Balogun-a ball pass sual dawngtu Willian chuan Hazard tan ball duhthusam a siamsak ve bawk.

Defender ven loh kara awm Hazard hian halfway line bul aṭangin chak zetin ball a tlantlang pui a, Brighton keeper Mat Ryan tana dan hman loh turin lei hrulah chiang zetin a khung, second half-a Solly March goal erawhin awmzia a nei phak lo.

Belgium international Hazard hian season kal laiah league goal vawi riat a khung tawh bakah, inelna hrang hrangah assist vawi kua a nei tawh bawk - ṭhiante khung tur siamsak hnem lamah European league lian panga zinga record nei ṭha ber a ni mek.

Blues manager Sarri chuan, "Hazard hian vawi hnih hliam a neih tawh avangin a taksa dinhmun hian duhthu a la sam lo deuh, chutih rual chuan hma a sawn hle. A theihna san zia ka hria a, tuna a thlen chin aia sang daih hi a la thleng thei ang," a ti a, hun tawp dawna Hazard an lakchhuah chu a dinhmun a ngaihtuahawm loh thu a sawi nghal bawk.