Champions League last 16 Liverpool hmaah Bayern, United tan PSG

Europe-a club te inelna sang ber Champions League round of 16-a inhmachhawn tur chu nimin khan a chiang a, Liverpool hmaa ding tur chu German champion Bayern Munich an ni.

Reds manager Jurgen Klopp hian Borussia Dortmund a enkawl laiin 2013 Champions League final-ah Bayern a lo hmachhawn tawh a, a tlawm zawkah a ṭang. Klopp tan phuba lakna remchang a ni ang.

Manchester United tan kawng a awlsam dawn bik lo. Match hnuhnung bera Valencia an ngam loh rah tuarin United hian an group-a pahnihna nichungin last 16 an lut a, an hmaa ding tur chu Paris St-Germain an ni.

Premier League champion Manchester City-in Schalke an tum dawn a, Tottenham Hotspur-in Borussia Dortmund an hmachhawn dawn bawk avangin City hi Premier League club zinga last 16 fixture nei awlsam bera chhal ngam an ni.

Champion lai Real Madrid-in Ajax an hmachhawn dawn avangin Spanish club kalkawng hi 'awlsam' tia sawi theih a ni a, La Liga lama an elpui Barcelona pawhin Lyon an hmachhawn dawn avangin quarterfinal lut ngei tura ngaih an ni.

Cristiano Ronaldo chu Madrid khawpuiah a kir dawn a, Champions League nomawi chawi beiseia amah laluttu Juventus chu Atletico Madrid a hmachhawn pui ang.

Champions League last 16 first leg hi February 12-13 leh February 19-20-ah khelh tur a ni dawn a, second leg hi March 5-6 leh March 12-13-ah khelh tur a ni dawn bawk.

Group hmahruaitu nichunga last 16 lut team-in khualmualah match an khel hmasa ang.

Last 16 Fixtures
Schalke vs Manchester City
Atletico Madrid vs Juventus
Manchester United vs Paris St-Germain
Tottenham vs Borussia Dortmund
Lyon vs Barcelona
Roma vs Porto
Ajax vs Real Madrid
Liverpool vs Bayern Munich
*Club hming hmasa zawk hi first leg-a mahni khelmuala khel tur zawk zel an ni.