East Bengal mawitu Danmawia
Pathianni zan khan Salt Lake Stadium-ah Kolkata Derby khelh a ni a, East Bengal-in R. Laldanmawia goal hnih leh assist vawi khat hmangin Mohun Bagan 3-2 in an hneh. Sialhawk tlangval hi hero of the match a thlan niin a chet dan hi Kolkata 'titi' a tling.
I League inelna neih mekah Kolkata club lian pahnih che ṭha tawk lo mah se derby match erawhin ngaihven a hlawh a, Danmawia ropui zanah hian entu 64,867 zet an pungkhawm nia chhut a ni.
Mizo panga
Kolkata Derby-ah hian Mizo pangain inkhel bul an ṭan a, East Bengal tan captain Lalrindika Ralte bakah Danmawia, Lalramchullova leh Brandon VL Remdika ten inkhel bul an ṭan.
Mohun Bagan tan Lalchhawn-kima chu tlarhnungah a awm a, Mariners foreinger pahnih Yuta Kinowaki leh Eze Kingsley te chu Mizo club Aizawl FC tana khel tawh an ni bawk.
Danmawia a mawi
Mohun Bagan tan minute 13-na lekah Omar Elhussieny thawhrah sengin Azharuddin Mallick-a'n a tauh lut a, Red and Gold-in chhantu an mamawh. Minute li hnuah Danmawia a rawn lang a, Sialhawk tlangval hian Brandon leh Jobby Justin te nen 'one touch pass' hmanga East Bengal tlarhnung ṭhiatin siphurh an sut.
First half tawp hma chiahin Danmawia'n a siamtu chu siam sak letin tun season hmang ṭha Jobby Justin chuan bicyle kick hmangin goal mawi a khung a, halftime-ah East Bengal-in 2-1 in hma an hruai chiah bawk.
East Bengal an vannei chhun-zawm a, Jobby Justin tluk uar zarah Bagan defender Kingsley chuan yellow card vawi hnihna hmuin minute 59-naah hnawhchhuah a ni a. Mual sir lama freekick hi Didika Ralte chuan petin Danmawia'n goal-ah a tauh a, keeper Gurjinder Kumar-a'n a vawi khatnaah dang mah se Sialhawk tlangval hian a per hi a pet leh hman!
Bagan-in player 10-a an khelh hnuah Asier Pierrick Dipanda Dicka hmangin minute 75-naah an siphurh an sut ṭhen a, goal dang erawh a luh belh tawh lo.
MPL chhul chhuak
Danmawia chanchin tarlan chuan a inzir chhuahna 1st Bn MAP Academy tarlan a ṭul a, a hmuchhuaktu coach Lalramhluna'n fak a phu bawk. Hemi hnu hian MPL-ah Dinthar tan khelin T. Vanlalhluna leh HC Zarzoliana te enkawlna hnuaiah intuai hriam lehzualin MPL hmasa berah an champion bakah best player atan thlan a ni.
East Bengal forward Danmawia chuan, "Ka lawm takzet a, ka beisei phak bakin ka che ṭha. Pathian zar a ni a, team thawhona rah a ni a, ka vannei tel bawk," tiin Vanglaini a hrilh.
Kolkata derby-a East Bengal an chak takah chuan dinhmun derthawng coach Alejandro Menen-dez pawhin a hna a la chhunzawm thei dawn niin a lang a, Spanish coach hian Mizo tlangvalte chungah lawmthu sawi a ba ang.