Carabao Cup champion lai City inlan dawn

Zanin dar 1:15 hian Carabao Cup (League Cup) quarterfinal khelh a ni dawn a, champion lai Manchester City chuan King Power Stadium-ah Leicester City an tlawh ang. Inkhel dangah Middlesbrough-in Burton Albion an mikhual bawk dawn.

Kumin quarterfinal-ah hian City bakah hian club liana chhiar Arsenal, Tottenham Hotspur leh Chelsea te an la dam a, naktuk zan hian Emirates Stadium-ah North London Derby khelh a ni dawn a. Blues-in Stamford Bridge-ah AFC Bournemouth an mikhual dawn a, a hmawr bawkna lamah hmuhnawm a awm dawn niin a ngaih theih.

Nomawi a hlu

Inelna lian pathum Premier League, FA Cup leh League Cup zingah zanina khelh tur inlena hi dah hniam ber a ni a, chutihrualin tun hnaia club tam zawkin sum an hmang nasat avangin nomawi chawi a harsa tawh a, Carabao Cup pawh nam nul theih a ni tawh lo.

League Cup-ah hian 'big six' aṭangin Liverpool leh Manchester United te an tla tawh a, tun hnaiah Jurgen Klopp-a hnuaiah Reds an vul hle. Amaherawhchu German coach hnuaiah hian Liverpool-in nomawi an la chawi lo a, Reds-in nomawi an chawi hnuhnung ber chu League Cup hi niin 2012 final-ah Cardiff City chu penalty hmangin an hneh.

Manchester United erawh Sir Alex Ferguson-a chawlh hnuah Premier League la chawi leh lo mah se 2017 khan League Cup final-ah Southampton hnehin nomawi an chawi a, anni tan pawh League Cup hi an nomawi chawi hnuhnun ber a ni.

Chelsea pawh Antonio Conte hnuaiah nikum khan FA Cup an champion a, 2017-ah league nomawi an chawi bawk a, amaherawhchu coach thar Maurizio Sarri hnuaia champion an duh chuan League Cup hi a beiseiawm ber a ni.

Tottenham Hotspur pawh Mauricio Pochettino hnuaiah nasa takin hma sawn mah se Argentine manager hian nomawi a keng tel rih lo a, an champion hnuhnun ber chu 2008-a League Cup-a an champion kha a nih daih tawh avangin League Cup an lak thu tak a ṭul dawn. Arsenal-in manager chhuak ta Arsene Wenger sawisel nasa viau mah se French manager hnuaiah hian 2017 khan FA Cup an chawi a, League Cup erawh naupang chhawr nan an hman ṭhin avangin Wenger-a hnuaiah vawi khat mah an champion lo a, kum 1993 kha an champion hnuhnun ber a ni daih. Unai Emery hnuaiah nomawi an duh a nih chuan an hmelma Spurs ang thoin League Cup lam an melh aṭul ang.

City an dang

Manchester City erawh season liam taa League Cup an champion bakah Premier League thunun chunga an champion avangin Pep Guardiola tan Carabao Cup a hlu hran lo. Hei vang tak hian Spanish manager hian a tih ṭhin dan pangngaiin player siksawina hunah a hmang dawn a, nomawi humhim erawh a duh dawn.

Foxes nen hian hun rei tak inhliam tawh Kevin De Bruyne pawh a inlan tura beisei a ni. City boss Pep Guardiola chuan, "A intuai hriam nan Leicester nena a inkhelh hi a ṭul a ni," tiin khelhna hun a pek tur thu a sawi a, champion lai an la ṭha tho dawn tihna a ni.

Chutihrualin season liam ta thlir kir chuan Leicester City hian quarterfinal-ah Man City tan harsatna an siam a, hun pangngaiah 1-1 a inhnehtawkin extra time khelh hnuah an inhnehtawk zui a, penalty shootout-ah an hneh hram. He inkhel zawh hian Pep chuan, "Quadruple theihngilh ru," tiin a sawi a; Champions League, Premier League, FA Cup leh League Cup champion kawp a theih loh thu a sawi hial.

Tun season-ah pawh City hi quadruple thei dinhmunah la ding mah se league lamah Liverpool an chet ṭhat ve bawk avangin nomawi chawi miah loin season an khar thei ve bawk.

League Cup - Quarterfinal
Zanin Inkhel Tur
Middlesbrough 1:15 AM Burton Albion
Leicester City 1:15 AM Manchester City
December 19, Nilaini Zan
Arsenal 1:15 AM Tottenham Hotspur
Chelsea 1:15 AM AFC Bournemouth