Messi ropuina hmaah Levante an thamral

Pathianni zan La Liga in­khel­ah Barcelona chuan 5-0 in Levante an sawp a, Lionel Messi ropuina tarlanna inkhel a ni - hattrick a siam a, goal hnih dang hi a assist a ni bawk!

Spanish champion tan Messi bakah Luis Suarez leh Gerard Pique te chuan goal khat ve ve an khung a, Levante defender Erick Cabaco chu hun tawp nan minute 14 chauh a awm tawh tihah hnawhchhuah a ni bawk a, Barca an chak chiang hle.

Barcelona-in hnehna an chan avangin La Liga-ah hma an hruai chhunzawm zel a, anmahni hnaih bertu Sevilla chuan 2-0 a Girona hnehin point thum an hlawh chhuak ve bawk a, table-ah pahnihna dinhmun an luah chhunzawm zel.

Real Madrid-in palina din­hmun an hauh a, an chung chiah­ah hian Sevilla nena an point hmuh zat in ang Atletico Madrid an awm bawk - La Liga a ngaihnawm chho zel dawn niin a lang.

A hma chuan...

Catalan club hian season hma­sa khan season tluan tlawm miah loa league nomawi chawina remchang nei mah se Levante hi khualmualah 4-5 in an ngam lo.

Season hmasa an intawn ṭum hian Philippe Coutinho chuan hattrick siam mah se Levante tan Emmanuel Boateng chuan goal thum khung ve bawkin Enis Bardhi chuan vawi hnih a pet goal ve bawk.

Tlawm miah loa season khar thei Barca an tlawm a, league match 38 an khelha an tlawm awmchhun chu Levante a ni - season tharah erawh engkim a danglam ta.

Season hmasa an intawn ṭuma Levante goal khung zat goal nga Barca-in an khung a, Levante erawhin goal an khung ve tawh lo.

A danglam tawh

Levante-in season hmasaa an ngam hnu Barca lakah tlawm an tum lo a, inkhel ṭan tir lamah phei chuan Catalan club aiin an langsar zawk - season hmasaa hattrick siamtu Boateng bawk a langsar.

Mahse, Ghanaian striker hi season hmasa angin a vannei nawn tawh lo. A hun ṭha neih hmasa zawk chu crossbar pet per nan a hmang a, goal ngei tura ngaih chu Barca keeper Marc-Andre ter Stegen chuan ṭha zetin a dang bawk.

Minute 35-na a ni a, Barce­lona tan Luis Suarez chuan goal hmahruai a khung. Uruguayan striker goal khung hi Messi-a'n defender hual vel kar aṭanga a siamsak a ni a, league match 15-a goal 11 a khungna a ni nghal.

Messi hian minute 43-naah a goal hmasa ber a khung zui a, Sergio Busquets ball siamsak chu um lutin goal-ah a chantir.

Messi a vul

Chawlhlawk hman a nih hnuah pawh Messi-a'n a duh­tawk mai lo. Minute 47-naah a goal hnihna a khung zui a, minute 60-naah hnai set sawt aṭangin a hattrick siamna goal a khung zui.

Barcelona-in an duhtawk mai lo. Hun tawp nan minute hnih chauh a awm tawh tihah Pique chuan an goal ngana a khung a, awlsam takin Barca-in hnehna an chang.

Messi-a'n hattrick a siam hian tun season-a league match 14 a khelh aṭangin goal 14 a khung tihna a ni a, inelna hrang hranga match 19 a khelh aṭangin goal 20 a khung tawh bawk.

Argentine striker hian kuminah ram leh club tan inelna hrang hrangah goal 50 a khung tling tawh a, kum 2018-a goal 50 khung tling thei hmasa ber niin a hattrick kha a career-a vawi 49-a siamna a ni bawk.