French Open entu an awm dawn - FFT

French Tennis Federation (FFT) chuan tun hnai khan thuchhuah an siam a, September thlaa khelh tur French Open 2020 chu a hmuna entu an awm theih ngei an beisei - sorkar pawmpuina erawh an neih a ngai dawn.

FFT president Bernard Giudicelli chuan, "Kan kalpui dan tur hi chiang taka sawifel theih a la ni lo a, a hmuna entu awm lo chu a ni dawn lo tih erawh ka chiang. Thuneitu lam nen kan la sawi khawm leh ang.

"Harsatna thleng thei hrang hrang a awm, a bik takin player rawn zin tur ten buaina an tawk thei. Amaherawhchu, a awlsam zawnga chhut chuan player ranking sang 100 zinga 75 vel hi Europe khawmualpuia awm an ni a, an tan Paris pan a harsat loh ka ring," a ti.

March thla aṭang khan coronavirus vangin khawvel pumah tennis inelna chawlh lailawk a ni. May thlaa neih tur French Open pawh hi September tawp lama khelh turin an sawn hla. Clay court inelna dang Paris Masters chu October 31 aṭanga khelh tum a ni bawk.

August 31 aṭang hian Grand Slam dang pakhat zawk US Open chu New York khawpuiah a hmuna entu awm loin an khel dawn.