Ka nihna ka fiah - Sindhu

PV Sindhu chuan BWF World Tour Finals title a lak chuan a theihna dik tak a phochhuak nia a hriat thu a sawi a, amah sawiseltute pawhin an lawmpui a beisei thu a sawi bawk.

Rio Olympic silver meda­list Sindhu hian kumin chhung­in final a khel hnem a, mahse a champion hleithei lo. In­dian Open, Commonwealth Games, Thailand Open, World Cham­pionship leh Asian Games-ah te pahnihna a ni vek.

BWF World Tour Finals title a inchuhpui Nozomi Okuhara hi tun hnaiah vawi sarih ngawt a ngam lo, tunah erawh Japanese nula lakah hnehna chang chung ngeiin nomawi a chawi ta - Indian shuttler tan season kharna duhawm a ni.

Kum 23 mi Sindhu chuan, "Ka tan chuan season harsa tak anga sawi theih a ni, a hmawr ka bawk dan erawh ka lawm hle. A bik takin India mi zinga hetiang dinhmun luah hmasa bertu nih hi a hlu bik," tiin a sawi.

Hyderabad nula Sindhu hian lawmman atan Rs 85,96,200 a dawng nghal a, India rama bad­min­ton thuneitu sang Badmin­ton Association of India (BAI) chuan nuai 10 an pek tur thu an puang zui nghal bawk.