FA Cup final khel tur Chelsea

Chelsea-in Champions League leh Premier League nomawi beisei tur nei tawh lo mah se beisei tur dang an la nei e - Pathianni zan khan FA Cup semifinal-ah Crystal Palace chu 2-0 in an hneh a, Blues hian FA Cup final an lut.

Chelsea tan Ruben Loftus-Cheek leh Mason Mount te chuan goal khat ve ve an khung a, Palace-in a chhanletna tur an neih loh avangin tun hnaia talbuai Chelsea an tlang.

London club hian final-ah Manchester City ngamtu Liverpool an hmachhawn dawn a, a awlsam lo ang - final hi May 14-a khelh tura ruahman a ni a, inkhel en châkawm tak takin min hmuak zel.

Chelsea leh Liverpool hi tun season League Cup final-ah an lo intawng tawh a, Wembley Stadium-a team pahnih intawn hmasakah hian penalty hmanga chak zawk zawn niin Reds an vannei zawk - Blues-in phuba lak an châk khawp ang.

Hei le Chelsea
Wembley Stadium-ah team pahnihin goal khung an harsat a, rei tak chhung chu goal kan hmu lo - mahse, minute 65-naah Blues-in final khelh ngei an duh a ni tih an pholang a, hliam vanga lakchhuah Mateo Kovacic aia luhtir Ruben Loftus-Cheek chuan goal hmahruai a rawn khung.

Blues hian an duhtawk mai lo. Minute 76-naah Mason Mount a rawn inlar ve leh a, England international hian Palace beiseina neih zawng zawng chu phum bo sakin, chak nemnghehna goal a rawn khung.

Arsenal legend Patrick Vieira enkawl Palace tan team ṭha zawk Chelsea laka goal hnih chhuah hnua comeback chu thil harsa a tling a, chance nei ve tho bawk mah se hun tawp thlengin goal an khung lo a, Chelsea an tlang.

Palace tan hian Cheikhou Kouyate chuan first half-ah chance duhawm a nei a, mahse, Blues keeper Edouard Mendy chuan ṭha takin a dansak - Palace fan-ten, "Ta se," tia duhthusam chungin ui takin an thlirlet fo ang.

Chelsea beiseina
Thomas Tuchel-a hoin Chelsea hian UEFA Super Cup leh Club World Cup nomawi an chawi tawh a, mahse, nomawi ngaihhlut hlawh zual pahnih Premier League leh Champions League-a beisei tur an nei tawh lo erawh fans tan a na ang.

Chelsea tan chuan FA Cup champion nih hi an fan-te rilru thawi damna tur ṭha ber a ni dawn a, UK sorkarin Roman Abramovich a hremna avanga club talbuaina nena chhut phei chuan FA Cup champion pawh a hlu lehzual dawn.

Chutihrual chuan Santiago Bernabeu-a goal thum khung thei team hian champion an duh chuan goal khung an zir thar a ṭul - Champions League-ah tlang zo ta lo mah se an khelh ṭhat ni chuan an hlauhawm tih hmuh turin a awm a, Palace lakah chance uiawm tak takin an hlah thung.

Goal khung tura lakluh Romelu Lukaku hian Italy ngaia lunglen a la bansan lo em ni chu aw, tih tur a ni a, bench aṭanga lut striker hian awlsam taka khung mai tur nia langah post a tih per a, Timo Werner-a'n chance duhawm a hlah bawk - German forward erawh a khel ṭha a, Chelsea fan-ten an ngaidamin a rinawm!

Chelsea vanneihna
Palace an ṭang rual ṭha a, Chelsea an chelh thei viau - mahse, hemi rual chiah hian Blues lamin an thiampuipa Wilfried Zaha an lo dah ṭhatsak a, Ivory Coast international a hlauhawm loh miau avangin an che hleithei lo.

Hetihrual hian Palace tana ngaihawm ber nia lang chu Conor Gallagher a ni - English midfielder hi Chelsea aṭanga loan-a an hawh a ni a, an inremnaah a club Chelsea a hmachhawn a rem loh avangin Blues lakah a inlan lo a, Palace-in an tuar.

Kum 22 mi midfielder hian Palace tan tun season-ah match 32 khelin goal riat a khung tawh a, assist vawi nga a nei bawk - a tel loin Palace midfield an kim lo a, a taimakna, thiamna leh finna ang nei ve dang an awm lo.

Gallagher hi inlan ta ngat se inkhel result a danglam mai thei - chumi ngaihtuah chuan Chelsea an vannei a, final-ah kil tina player ṭha kawltu Liverpool an hmachhawn dawn avangin a harsa lehzual ang.

FA Cup Semifinal
April 16, Inrinni Zan
Manchester City 2 - 3 Liverpool
MNC: Jack Grealish 47'; Bernardo Silva 90+1'
LIV: Ibrahima Konate 9'; Sadio Mane 17', 45'
April 17, Pathianni Zan
Chelsea 2 - 0 Crystal Palace
CHE: Ruben Loftus-Cheek 65'; Mason Mount 76'
May 14, Inrinni - FA Cup Final
Liverpool vs Chelsea