Dutch Cup final-ah PSV-in Ajax an hneh

Manchester United nena sawizawm Erik ten Hag-a kaihhruai Ajax chuan Pathianni zan khan KNVB Cup final-ah PSV Eindhoven an hneh lo.

Feyenoord Stadium-a inkhelah Ryan Gravenberch-a goal hmangin Ajax-in minute 23-naah hma hruai mah se PSV-in Erick Gutierrez (48') leh Cody Gakpo (50') te goal hmangin an lehthal.

PSV tan Dutch Cup vawi 10 an chawina a ni a, champion ngun ber erawh Ajax niin vawi 20 an champion tawh thung. Final-ah hian Ten Hag-a'n goalkeeper Andre Onana leh star striker Sebastien Haller te bul a ṭantir loh avangin sawizui a hlawh.

Chutihrualin Eredivisie-ah erawh match nga khelh tur la awmah Ajax hian PSV aiin point liin an hmu tam a, Erik ten Hag-a hote hi champion turin an dinhmun a la ṭha ber.

Ajax technical manager Gerry Hamstra chuan, "Club lian zawkin Erik ten Hag an duh hi hna a thawh ṭhat avangin thil mak a ni lo. Chutihrualin min la chhuahsan lo a, a cham theih nan theihtawp kan chhuah ang," tiin Man United nen inremna thui tak an nei tawh chungin chelh an tum thu a sawi.

PSV manager Roger Schmidt pawhin season tharah Dutch club chhuahsanin Benfica a zawm dawn a, Portuguese club tan July 2024 thleng daih contract a ziak tawh. Hemi a nih avang hian Schmidt tan Dutch Cup chawi hi hlu hle.