Anfield-ah beiseina nen Man United

English football-ah team inhal tam tak an awm a, intih elna au hla ngeiawm tak tak an nei a, an inngaisang lo tawn ṭhin hle - chutiang zingah chuan Liverpool leh Manchester United aia inhal zawk thlang dawn ila, thlan tur an vang khawpin a rinawm.

Chutiang taka team inhal pahnih chu zanin dar 12:30-ah an intawng dawn a, Liverpool khelmualah Manchester United an lenglut dawn - a hmuhnawm loh pawhin a boruak a sang ang!

Liverpool-in quadruple champion nih an beisei mek a, Manchester United erawh Champions League khelh phak tum an ni thung. Team pahnih tum a inthlau ta deuh a, an inhuatna erawh a nep phah lo.

Reds manager Jurgen Klopp chuan, "Friendly game a ni ngai lo tih chu kan hriat sa vek a ni," tiin an inkhel tur boruak a san tur thu a sawi a, team pahnihin a tlawm zawk nih an duh dawn lo ve ve.

A harsa dawn
League Cup-ah Liverpool an champion tawh a, FA Cup-ah final an lut a, Champions League-ah semifinal an khel dawn a, Premier League-ah hmahruaitu Manchester City chu point khat lekin an phak lo bawk.

Liverpool ṭhatzia inhrilh nawn a ngai lo a, United erawh an talbuai viau thung. Red Devils hian an league match hnuhnung berah Norwich City chu 3-2 in an hneh hram a, point thum hawn mah se inchhuanna tur a tlem hle.

Man United boss Ralf Rangnick chuan, "Liverpool hi tun season-ah nomawi pali chawi thei dinhmunah an ding mek a, Norwich laka kan khelh dan anga kan khelh ngat chuan point khat hawn pawh a harsa ang," a ti!

German coach chuan sawi zawmin, "Hei hi thil nihphung dik tak chu a ni a, fimkhur pawh a ṭul a ni," a ti bawk - United hi Premier League table-ah pangana an ni mek a, palina Tottenham Hotspur chu point thumin an phak lo mek a, Champions League khelh duh tan tlawm a thiang tawh lo.

United an buai
Liverpool tum dawna United mamawh loh ber chu 'buaina' a ni a, mahse, Norwich laka an inkhel en chuan an team boruak a ṭha lo tih an hmu thiam ang.

Premier League tlak hlau club nena an inkhelh ṭum hian captain Harry Maguire chuan Paul Pogba a kheng fuh a, Pogba hian khelmual chhungah a lungawi lohzia a lantir zui!

French midfielder hi Rangnick-a'n a lak chhuahin fan-ten an lo au el a, mahni club khelhna ngeiten an auh el nih hi pai dam a harsa ang. Pogba hian ngawih chuh mai loin, fans lamah a beng dawh zuiin a tih el.

United fan-ten hun harsaah an team thlawp tur an nih laiin an player-te an au el zawk a, chutihrualin Pogba tan chhanlet kha a tihtur a ni lo - Anfield lenluh dawna boruak neih atan chu a duhawm lo takzet.

Hei le Ronaldo
Manchester United tan Cristiano Ronaldo bawk chu innghahna tur a ni leh dawn a, kum 37 mi forward hi a kum tam tawh mah se a thiam ngaiin a la thiam reng a, Reds hmachhawn hmaa an match hnuhnung berah hattrick a siam.

Ronaldo hian tun season-a match 34 a khelh aṭangin goal 21 a khung leh der tawh a, inrintawkna sang tak nen Anfield a pan ang - mahse, a hmachhawn tur hi tun season Premier League-a goal chhuah tam pahnihna Norwich ni loin goal chhuah tlem pahnihna Liverpool an ni.

He thu buatsaih lai hian United tan Raphael Varane inlan theih dawn leh dawn loh a la chiang lo a, French defender hi rawn kir thei tura beisei erawh a ni - United fan-te thla a muang sawt ang.

Hetihlai hian midfielder Fred leh Scott McTominay te pawh hliam vang thoin an lo kir a la rinawm chiah lo a, striker Edinson Cavani leh left back Luke Shaw chu inlan lo tur chiang an ni bawk.

Reds an dam
United tan thu hriat nuam lo tak a awm a, chu chu Liverpool dam kim thu a ni. FA Cup semifinal an khelh hma khan Diogo Jota chuan hliam tenau a nei a, mahse, City an hnehna inkhelah khan Jota hi bench aṭanga luhtir a ni a, Reds an dam kim.

Inelna pathum an la tel meknaah Liverpool an la dam kim vek miau a, fixture a hautak lo thei lo - United zawhah Pathianni zan khian Everton an hmachhawn zui ang a, Champions League semifinal-in a zui ang.

Klopp-a tean player siksawi thiam a ṭul tihna a ni a, zaninah pawh City laka khel chau lo aṭangin team a siksawi a rinawm. Chuti a nih chuan tlarhnungah Virgil van Dijk kawp turin Joel Matip a lo kir ang a, Mohamed Salah leh Sadio Mane te nena ding turin Roberto Firmino tan chance a awm bawk tura ngaih a ni.

Midfield-ah Naby Keita aiah captain Jordan Henderson chuan bul a ṭan tawh tura ngaih a ni bawk - hetihrual hian fan-te mit fukna tur chu Salah a ni leh dawn a, Egypt-in World Cup an khelh phak loh hnua Reds tana goal la khung leh lo forward hian a thiamna leh theihna a pholan a hun leh tawh.

Zawi te tein...
Liverpool fan-ten quadruple an sawi ri deuh reng tawh a, season khata nomawi liantham pali chawi hmasa ber nih an duh - mahse, an beisei ang ngawtin a awlsam dawn lo.

A awlsam zawnga thlir chuan Reds-in nomawi pakhat an chawi tawh a, a bak pathumah an dinhmun a ṭha em em bawk - a harsa zawnga thlir erawh chuan match khelh hmabak an neihah champion tur chuan chak vek a ngai thung!

Reds manager Klopp chuan, "A pawimawh ber chu kan hmabak match zel hi a ni a, kan match khelh leh tura kan chak phawt zel a ṭul a, kan fixture hautak karah kan insiamrem hman zel ang em, tihte pawh en a ngai a ni," a ti a, an hmaah tlang sang tak lawn tur a la awm tih a hai lo.

United fans tam takin City aiin Liverpool an haw zawk a, Reds champion ai chuan Pep Guardiola leh a naute champion an duh zawk - Champions League khelh phak an tum piahlamah, an hmelma club-in thawnthu ropui ziah an tum hi tihtawpsak an duh ngei ang tih a chiang a, zanina mengrei turin lo inpuahchah phawt mai rawh le!