Monte Carlo champion Tsitsipas

Stefanos Tsitsipas chuan Alejandro Davidovich Fokina hnehin Monte Carlo Masters nomawi a chawi a, clay court inelna Monte Carlo-ah hian Rafael Nadal tih lohah chuan mahni nomawi humhim thei hmasa ber a ni.

Greek tlangval hian Pathianni zana final khelhah 6-3, 7-6(3) in hnehna a chang a, season kal laia title a lakna hmasa ber a ni. Masters title erawh vawi hnih a chawina niin, atan French Open khelh a zuam awm sawt ang.

Chak lo mah se Davidovich Fokina hian hriatreng a hlawh dawn. A match hmasa berah world number 1 Novak Djokovic a hneh thei a, final kalkawngah Indian Wells champion Taylor Fritz a hneh leh bawk.

World number 46 hian Tsitsipas lakah pawh bul a ṭan fuh, set hmasa berah 2-1 in hma a hruai thei. Mahse, hma a hruai hnuah a service a hloh zui a, inkhel boruak sangah tawnhriat nei tlem zawk a nihna a lang.

Kum 23 mi Tsitsipas chuan, "Engkim mai kha a ṭha vek bik lo, mahse harsatna leh buaina pawh ka hmachhawn thei a ni tih ka lantir avangin ka lawm. Hlawhtlinna hi awlsam taka hlawh chhuah ngawt theih a ni lo.

"Tunah hian world number 5 ka ni a, theih ni se chu French Open khelh hunah number 2 nih hman ka duh," tiin a ranking siam ṭhat pawh a duh, chumi tur chuan Rome leh Madrid Open lama chet ṭhat ve viau a ngai ang.

Season hmasa French Open-ah khan Tsitsipas hian final a lut a, mahse Novak Djokovic a ngam lo. Tun season-ah Djokovic a inkhel tam lo, a inkhelh chhunah pawh beisei a la phak lo hle.

Nadal chu hliam vangin a chawl mek a, a lo kir hun tur sawi lawk theih a la ni lo. Clay court-a inkhel thiam Tsitsipas tan hian Grand Slam nomawi hmasa ber chawi theihna hun ṭha a inhawng a nih pawhin a mak lo ang.