Bayern tan match khat a la ngai

Bayern Munich chuan a zawna a vawi 10 nan Bundesliga nomawi an chawi dawn. Bavarians tan German champion ni turin match khat chak a tawk tawh a, an hmabak chu pahnihna ni lai Borussia Dortmund an ni. Bayern leh Dortmund hi April 23, Inrinni zan dar 10:00-ah an inkhel ang.

Inrinni zan Bundesliga inkhelah Bayern hian Jacob Barrett Laursen-a own goal bakah, forward Serge Gnabry leh Jamal Musiala te goal hmangin Arminia Bielefeld chu 3-0 in an hneh.

League match khelh hmabak pali an la nei a, tunah hian point kua zetin an sang fal. An match lehpeka an khelh tur hi Dortmund an nih avangin, an chak a nih chuan an champion der dawn tihna a ni.

Julian Nagelsmann-a enkawlna hnuaiah league champion chu an ni dawn. Mahse, Champions League-ah team ṭha lo zawka ngaih Villarreal an hneh lo a, striker Robert Lewandowski hma hun a chiang lo mek bawk - chinfel ngai an nei nual.

Bayern Munich CEO Oliver Kahn chuan, "Robert hi season khata goal 30 aṭanga goal 40 khung thei a ni a, inngaihtuah buai ngai miah loin kan hnena awm zel turin kan duh, inbiakna pawh a kal mek," a ti.

Poland international hian Bayern tan kum 2023 thleng daih contract a nei. Contract thar a ziak a nih chuan kum thum daih a duh nia sawi a ni a, indinthar tum Barcelona an lo lan ve bawk avangin thil a ti khaihlak deuh, an la inrem thei chiah lo.