A hun tea rah ṭhin Benzema

Karim Benzema chuan hun pek belh minute hnihnaah Real Madrid tan goal a khung a, an elpui Sevilla lakah Madrid khaw club hi 3-2 in hnehna a chanpui - Real chhandamtu chu Benzema bawk a ni leh ta.

Sevilla hian Ivan Rakitic leh Erik Lamela goal hmangin hun rei zawk hma an hruai a, mahse, Real an beidawng lo - Rodrygo leh Nacho hmangin an si phurh an sut a, hun pek belhah Benzema chuan chakna goal a khung zui.

Real-in match ruk chiah khelh tur an nei tawh a, point 15-in La Liga-ah hma an hruai fal mek - nizana inlan Barcelona result a zirin an inthlauhna hi la danglam leh thei a ni a, he thu buatsaih lai hian result kan hre hman lo.

Nizana Barca match chhiar tel lohin Real hi match khatin an khel tam zawk bawk - heti chung hian Real champion lohna tur chuan thil mak a thlen a ngai tawh a, Real tan ropuina ni a hnai zel.

Beisei loh lam
Sevilla-in Real an hneh chuan table-ah pahnihna an ni ang a, Carlo Ancelotti naute nena an inthlauhna chu point kua a ni dawn bawk - a tawi zawnga sawi chuan Julen Lopetegui naute tan champion beiseina chhi nung turin chak a ngai.

Chak mamawh Sevilla-in goal pawh an khung hma a, Barcelona midfielder hlui Ivan Rakitic chuan a thiam a la theihnghilh lo tih pholangin, minute 21-naah freekick hmangin goal hmahruai a khung a, hma takah Sevilla an chungnung der.

Sevilla an phur laklawh - goal an khung aṭanga minute lina lekah Lamela chuan a khung ve leh a, minute 25 chhung lekin rin hlawh lo zawk team-in 2-0 in hma an hruai a, an chak ngei rinna pawh a lian hman hle.

Mahse, chawlhlawk hman a nih hnuah Real an rawn insiamṭha a, Brazilian winger Rodrygo chuan tlawm an duh bik lo tih pholangin minute 50-naah si phurh a rawn sut ṭhen.

A hming Benzema
Real-in si phurh an sut ṭhen hnuah goal dang khung leh lawk lo mah se an beidawng lo - minute 82-naah an huaisen rah an seng ta nge nge a, Nacho chuan si phurh sut zawhna goal a rawn khung.

Sevilla-in point thum hmu tawh tura an inngaih hnuah goal hnih an chhuah a, point khatah lungawi an zir a ṭul dawn niin a lang. Mahse, Benzema-a'n ngaihdan dang a nei a, point insem lamin a lung a len ve lo!

French striker hian hun pek belh minute hnihnaah goal a rawn khung leh a, hmanni lawka Chelsea fan-te vel ṭaptu khan Ramon Sanchez-Pizjuan Stadium-a Sevilla fans pungkhawmte ngawi rengin a haw tir leh ta.

Real-in champion turin hmabak match ruk an la neihah point 10 bak an mamawh tawh lo a, Carlo Ancelotti-a'n Spanish La Liga nomawi a chawi ngei dawn niin a lang.

Ballon d'Or?
Tun hnaiah Benzema leh Ballon d'Or-in sawi zawm an hlawh nasa a, tun season-a French striker khelh dan enin a awm lo hran lo - league nomawi a chawi a, Champions League nomawi an chawi ngat phei chuan ani tluka dawng chiang tur an awm kher lo ang.

Kum 34 mi striker hian tun season-ah inelna hrang hranga match 39 khelin goal 39 a khung tawh a, a professional career-a mimal season a hman ṭhat ber a ni - tun season tih loha season khata goal a khung hnem ber chu 2011-12 season kha a ni a, goal 32 a khung.

Ronaldo hliahkhuhna tlansanin Benzema nihna dik tak kan hmu chho ṭan a, he striker thiamzia hi kan la hmu dawn chauh niin a lang. Goal a khung tam piahlamah a hun taka a goal khung ṭhin chu amah fakna tizualtu a ni.

Champions League last 16-ah an comeback theih nan Paris Saint-Germain lakah hattrick a siam a, quarterfinal-ah Chelsea lakah hattrick a siam zui leh bawk - second leg-ah Blues-in comeback ropui an lantir dawn emaw tih laiin, extra time-ah chakna goal a khung leh bawk a, 'a hun tea rah ṭhin,' tia sawi pawh a awm viau e.

Atletico an chak
Champions League Atletico Madrid-in hnehna an chang ve leh ta a, an mikhual Espanyol chu hun pek belha an penalty hmuh hmangin 2-1 in an hneh - season thara European football khelh an la beisei chhunzawm ve zel.

Atletico tan an match hnuhnung pathum kha theihnghilh tlak a ni - Champions League aṭangin Manchester City-in an pet chhuak a, City nen an inkhelh karah Real Mallorca chuan league-ah 1-0 in an hneh bawk.

Mahse, Pathianni zanah erawh thawnthu a danglam ve ta. Atletico tan Yannick Carrasco chuan minute 52-naah goal hmahruai a khung a, mahse, minute 71-naah Geoffrey Kondogbia chu sawisel theih takin a yellow card pahnihna pek a ni a, hnawhchhuah a ni.

Kondogbia hnawhchhuahna aṭanga an freekick hmuh chu Raul de Tomas chuan goal khungna a hmang zui a, Atletico an lungawi lo hle. Mahse, Espanyol striker De Tomas hian hun pek belhah handball vangin penalty a chawi a, Carrasco bawkin petin goal-ah a chantir a, Atletico an chak.