Newcastle legend nih duh Guimaraes

Bruno Guimaraes-a goal hnih hmangin Newcastle United chuan Leicester City 2-1 in an hneh a, goal hnih khungtu Guimaraes hian Magpies legend nih a duh thu a sawi chhuak.

Neitu thar an neih hnuah Guimaraes hi Newcastle-in man tam tham deuh taka an lei hmasak ber a ni, January bazar lai khan pound maktaduai 35 sengin Lyon aṭangin an lalut.

A man a tam ang ngeiin khelmualah pawh a thawh hlawk, an mikhual Foxes lamin Ademola Lookman hmangin goal khung hmasa mah se Brazilian midfielder hian a sut bakah chakna goal a khung.

Bruno Guimaraes chuan, "Premier League khelh hi tun hma aṭanga ka duhthusam a ni ṭhin a, chumi chu a thlen dik hnuah lawmna tur dang pawh a lo awm zel.

"Team inlungrual leh thawhhona ṭha tak hnuaiah ka khel a, a nuam takzet. He hmunah hian legend nih ka duh," a ti a, a club thar lakah beisei a nei sangin hun rei tak cham a duh.