PSG tan nomawi a hnai ta

Paris St-Germain chuan Marseille 2-1 in an hneh a, Ligue 1-ah point 15 zetin hma an hruai fal ta. Nomawi la chawi chiah lo mah se an champion dawn chiang tia sawi ngam a ni tawh, vawi khat an chak leh chuan an champion der tawh ang.

Pathianni zan Paris khawpuia inkhelah PSG hian Neymar hmangin goal an khung hmasa, a siamsaktu chu midfielder Marco Verratti a ni, mikhual lamin Duje Caleta-Car hmangin an sut ve leh.

Mahse, chawlhlawk hma chiahin Kylian Mbappe-a'n penalty aṭangin an goal hnihna a khung. Mabppe leh Lionel Messi te goal khung dang erawh VAR hman a nih hnuah hnawlsak an ni thung.

Marseille pawh an vannei tawk lo. Arsenal aṭanga loan hmanga an hawh William Saliba chuan hun tawp dawnah chakna goal khungah a inngai, forward Dmitri Payet-a freekick aṭanga ball kal a khung chu VAR hmanga hnawlsak a ni ve bawk.

Ligue 1-ah hian champion hnem ber chu Marseille an ni a, 2010 khan a vawi 10 nan nomawi an chawi - a hnu lamah erawh an la champion leh lo. PSG hian kuminah champion hnem ber record hi an nih rual ang. An hnuaiah vawi riat champion tawh AS Monaco an awm ve bawk a ni.

PSG manager Mauricio Pochettino chuan, "Harsatna hrang hrang karah hmalam kan pan zel, tun ṭumah pawh khan duhthusamin khel lo mah ila hnehna kan chang thei, point 15 zeta hmahruai fal chu a ṭha hle.

"Player siksawi chungchang kan sawi ṭhin, kan la siksawi ve bawk ang. Tun atan chuan player ṭha rualin inman taka an khelhho theih hi kan tan a ṭha," a ti a, sang fal viau mah se inthlahdah a tum lo.