Lampard leh Chelsea inlan zan

Zanin dar 8:45 hian Chelsea-in Aston Villa hmachhawn turin Villa Park an tlawh dawn. Champions League khelh tum leh tlak hlau inkhel hi a nung khawp ang.

Blues tana chanchin ṭha chu Villa lakah hian record an nei ṭha hle. Tun ṭum hi Premier League-a vawi 50 an inhmachhawnna tur a ni a, Chelsea hi vawi 25 chakin Villa hi vawi 12 chauh an chak thung.

Premier League-a an intawn hnuhnung 10-ah Blues hi vawi kua chakin Villa hi vawi khat chauh an chak. An intawn hnuhnung ber chu nikum December 4 kha a ni a, Tammy Abraham leh Mason Mount te goal hmangin Stamford Bridge-ah 2-1 in Villa an hneh.

Chelsea hian competive match an khelh hnuhnun ber chu ni 105 liam ta kha a ni a, Everton 4-0 in an sawp. Premier League ṭan hmain friendly match-ah QPR 7-1 zetin an sawp bawk a, Ruben Loftus-Cheek leh Billy Gilmour ten goal hnih ve ve an khung. Frank Lampard-a hote inelna hmachhawn turin an inpeih.

Chutihrualin tun hnaia khawthlang media-ten London club chanchin an ziah ngun chhan erawh an player thar Timo Werner leh Hakim Ziyech te vang a ni a, zanina an inkhel turah ṭangkaina an nei lo. 

Villa hi an record enin chak lo tura dah theih mai an ni a, chhut uluk erawh chuan Frank Lampard-a hote tan a awlsam dawn lo. Aston Villa hian tunkar khan entu mipui awm loin Sheffield United an hmachhawn tawh a, Chelsea lakah an tawnhriat hi a ṭangkai ang.

Tun hma pawhin tla thei dinhmuna ding lakah club lian zawk an chesual fo tawh a, Jack Grealish khelhna club hi an muala khel tur an nih bawk avangin Blues tan chetsual theihna tur a ni ang.