Leeds aia vannei zawk Arsenal

Arsenal leh Pierre-Emerick Aubameyang ten goal an khung lo chhunzawm. Gunners hi Leeds United nen goal awm loin an inhnehtawk a, forward Nicolas Pepe hnawhchhuah vanga kim lo Mikel Arteta naute hi point khat hmuh vanga vannei zawk an ni.

Pathianni zan Pre-mier League inkhelah Marcelo Bielsa naute an hmuhnawm, substitute Rodrigo, Patrick Bamford leh Raphinha ten woodwork an tihper vek! Gunners lam erawhin goal zawnah vawi hnih bak an pet thei lo.

October 4 aṭanga chhutin Arsenal hian league match vawi nga an khel tawh a, heng zingah hian goal khat chiah an khung. An goal neih chhun pawh hi Manchester United an hneh ṭuma Auba-a'n penalty aṭanga a khung a ni.

Arteta hoin FA Cup an chawi a, season tir lam inelna hrang hrangah a zawnin match thum an chak chanchinte chu thawnthu mai a ni ta. Tunah chuan Arsenal tlarhma an bil a, attacking game an khelh theih loh bakah player phur leh thaza hmuh tur an awm lo.

Leeds lakah ball chang tlem zawk an ni a, goal khung theihna hun ṭha pawh an insiam thei lo. Second half tir lamah Nicolas Pepe chu Ezgjan Alioski hmaia a tauh vangin hnawhchhuah a ni, thil thleng hi VAR hmanga en a nih hnuah an hnawt chhuak.

Arsenal manager Arteta chuan, "Pawm theih a ni lo, khatiang thil kha chu hetiang ang inkhel pawimawh a tih loh tawp tur a ni," tiin Ivory Coast international chet danah a lawm lo. A player nen hian thil thleng an sawi dun tur thu a sawi bawk a ni.

Player kim lo a khel Gunners tan point khat hlawh chhuah hi thil lawmawm a ni a, chutihrualin point thum hmu thei an ni. Hun tawp dawnah Aubameyang-a'n Leeds defender Liam Cooper kut a pet per a, penalty beisei viau mah se VAR hman a nih hnuah a taksa a per hmasak avangin handball atan pawmsak an ni lo.

Goal khung lo mah se Leedes United-in an mikhual tan hna harsa tam tak an siamsak thei, striker Bamford khung tur chu keeper Bernd Leno-a'n ṭha zetin vawi hnih a dansak a, winger Raphinha pawhin German keeper hi a paltlang thei bik lo a ni.

Leeds-in goal khung tumin vawi 25 ngawt an pet, mahse target zawna kal chu vawi li chauh a ni. Bielsa kaihhruaina hnuaiah hian khel hmuhnawm viau ṭhin mah se 'chak' an zir tel a la ngai, an league match hnuhnung parukah vawi khat chauh hnehna an chang.

Argentine manager Bielsa chuan, "Inkhel result kha chu danglam tur chu a ni. A tir lamah player inzatin kan inkhel a, ball chang hnemin inkhel kan thunun thei. A tam zawk kan nih hnuah kha chuan chungnung lehzual tur kan niin ka hria.

"Hun ṭha tam zawk insiam thei tur kan ni a, a hmawr kan bawk thei lo kha a pawi. Goal kan khung loh avangin ka lawm lo, chutih rualin ka naute khelh danah kha chuan lawmna tur chu a tam zawk a ni," tiin a sawi.