Goal nen Asensio a lo kir: Benzema a ropui

Ningani zan La Liga inkhelah Real Madrid-in Valencia chu Champions League khelh beiseina an tihchhiatsak a, champion nomawi an beiseina an chhi nung zel thung. 

Real hian 3-0 in Valencia an hneh a, hliam vanga rei tak a chawlh hnuah Marco Asensio chuan goal a khung nghal a, Karim Benzema chuan goal hnih khungin Real tana goal khung tam pangana record thar a siam bawk. 

Madrid khaw club hian an elpui Barcelona chu league table-ah point hnih chiahin an thlau ta a, La Liga champion tur inum boruak a ngaihnawm zel. 

Real Madrid-in Santiago Bernabeu sak ṭhat mek a nih avangin an training ground-ah match an khelh chhunzawm zel a, Benzema hian minute 61-naah goal hmahruai hi a khung - Eden Hazard siamsak a ni. 

Hun tawp nan minute li chauh a awm tawh tihin Benzema hian a goal hnihna leh Real goal thumna ni bawk a khung leh a, goal ropui leh mawi bik a ni - coach Zinedine Zidane chuan a kuta a lu dawm chungin mak ti takin a thlir!

Benzema hian Real striker ropui zingah a hming a nem kai ve ta a, Spanish club tan hian inelna hrang hrangah match 503 khelin goal 243 a khung tling ta - Ferenc Puskas lehpelin Real tana goal khung tam pangana a ni a, tun season-ah match 38 khelin goal 21 a khung tling ta. 

Pre-season-ah Asensio a inhliam a, Covid-19 vanga league chawlh lailawk ni lo se tun season-ah a hmel kan hmu tawh kher lo ang. Mahse, chawlh laiin Asensio a dam a, a dam tih khelmualah a pholang zui. 

Ni 330 zet inkhel loa a awm hnuah Spanish midfielder hi minute 74-naah luhtir a ni a, a ball khawih hmasak ber hmangin goal a khung zui - khelmualah second 30 bak hun a hmang hman lo.

Asensio hian Benzema goal hnihna tur a siamsak zui bawk a, rei lo te chhungin goal hnih a rawn thawk chhuak hman tihna a ni. French striker Benzema goal khung hian goal mawi ber chawimawina FIFA Puskás Award a dawng a nih pawhin a mak lo ang - Real tana Puskas goal khung record khumna a la ni zui!

Real hian Covid-19 vanga chawlh reng hnua an league match hmasa berah Eibar chu 3-1 in an ngam a, he inkhelah hian hmuhnawm zetin Eden Hazard a inlar tawh. An goal thumah hian a inrawlh vek!

Valencia lakah pawh Hazard hian inthlahrun a tum lo. Pound maktaduai 150-a lei a nih kha a phu vang reng a ni tih pholangin Valencia tlarhnung tan buaipui tham a ni a, keeper Jasper Cillessen chet ṭhat zan ni lo se goal khungtu zingah a hming kan hmu ang. 

Hazard hian Benzema goal khung tur a siamsak a, French striker nena an inmanzia hmutu tan chuan hmuhnawm an tling. Real fan-ten hmuhnawm an ti lehzual ang. 

Champions League khelh tum Valencia hian match hmasa lamah 1-1 in Levante an lo inhnehtawkpui tawh a, season tharah European football-a club inelna sang ber an khel duh a nih chuan chetsual a thiang tawh lo tih an hria. 

Alfredo di Stefano Stadium-a inkhelah Valencia hian goal pawh an khung hmasa zawk niin an inhria a, mahse Rodrigo goal khung chu referee Jose Maria Sanchez Martinez-a'n VAR rawn a nih hnuin a pawmsak lo.

Valencia tan hian substitute Lee Kang-In chu minute 89-naah Sergio Ramos a pet luih avangin hnawhchhuah a ni bawk a, Valencia tan season thara Champions League beisei a harsa ta.