Chhinga Veng kaltluang a tawp ta

Chhinga Veng FC-in kum 2017 khan coach atan Lalsangzuala Hmar an lalut a, hemi hnu hian team ropui bik an din. Sanga hnuaiah hian season hnih chhungin MFA Super Cup leh I Day Football nomawi vawi hnih ve ve an chawi a, MPL-ah erawh an nomawi an hum thei ta lo.

Chhingcows hi Sanga hnuaia an season khatnaah inelna pathumah vawi khat chiah an chak lo a, Aizawl FC an hneh lo.

Season hnihah pawh record ṭha hi chhawmin MPL league round-a Mizoram Police laka an tlawm tih loh chu minute 90 chhunga tlawm an nei lo a, MPL final-ah pawh minute 120 chhung ṭang thei mah se penalty shootout-ah an vanduai a, kum zawna 'treble champion' nih erawh a rem ta lo.

Final zawhah Chhinga Veng coach Sanga'n dressing room a pan nghal a, team meeting zawhah pawh chhuah mai tum loin ṭhuthlengah a indawm kun a, hnem theih a ni lo. Kum zawna MPL nomawi club pahnih lakpui thei awm chhun Sanga chuan, "Kan vanduai a ni," tiin Vanglaini a hrilh a, thu dang sawi thei dinhmunah a ding lo.

MPL final-ah Sanga hi penalty shootout-ah a vawi hnih vanduaina a ni a, MPL3 final-ah khan H. Vanlalthlanga hnuaiah assistant coach hna chelhin Aizawl FC lakah bawk an chak lo.