Vawi 7-a kan vawi 3 hi a ropui - Aizawl FC technical director

Aizawl FC technical director Hmingthansanga pawhin, "Eng level-ah pawh a ber nih hi thil awlsam a ni ngai lo. Ber ni tur hian rim taka thawh a ngaih bakah vanneih tel pawh a ngaiin ka hria. MPL ṭum 7 khelh tawh a ṭum thum champion hi a hlu zual khawp mai. Aizawl FC hian rinawm taka ṭan tlattu fans kan nei reng mai hi a lawmawm lehzual, kan dinhmun chhiat lai leh ṭhat lai pawh a club tana theihtawp chhuah ṭhin fan-te chungah ka lawm em em a ni," tiin lawm thu a sawi.

Hmingthana hi Aizawl FC-in nomawi an chawi theihna tura lang lo lama pawimawh a ni a, AFC-in MPL3, MPL4 leh MPL7 bakah I League an champion theih nan a thlawh hlawk takzet.

Aizawl FC coach Gift Raikhan-a'n final khelh hmain a sawi lawk a, an champion chuan club neitu Robert Romawia Royte tan an hlan tur thu a sawi lawk. RRR-a hi MLA inthlanpui neih zawh takah Aizawl East II bialah thlan tlin a ni a, minster of state-ah dah niin Sports & Youth Services department a chang.

Inkhelh banah Gift chuan, "Pu Robert-a hlawhtlinna hi kan lawmpui em em a, kan tihsak theih sang ber chu MPL champion hi a ni. MPL nomawi hi atan kan hlan. Hemi rual hian kan champion theihna tura min ṭawiawmtu mipui kan hre reng a ni," tiin Vanglaini a hrilh a, an vanneih vanga champion an nih thu a sawi zui bawk.

Team chungchang sawi chhunzawmin Hmingthana chuan, "Kan player-te hi an rim khawp mai. Professional player an nih ang ngeiin an hnaah an chiang em em a, training-naah rim takin an thawk mai ṭhin. Coach Gift Raikhan leh coaching staff te an inpe em em mai a, an thawhrimna vang a ni. MPL 7-a kan champion hi a bik takin kan club neitu leh president Pu Robert-a tan kan hlan a. Pathian khawngaihna kan dawn avangin lawmthu kan sawi mawlh mawlh e," tiin lawm thu a sawi.