Sports Personality of the Year Thomas
Pathianni zan khan BBC Sports Personality of the Year Awards sem a ni a, award ngaihhlut hlawh Sports Personality of the Year 2018 atan Tour de France champion Geraint Thomas thlan a ni.
Team Sky rider Thomas hi cyclist Bradley Wiggins leh Chris Froome te hnuah chuan Britain mi zingah Tour de France-a hlawhtling leh thei hmasa ber a ni. Nikum lama he chawimawina dawng tawhtu Sir Mo Farah chuan award hi a hlan.
Kum 32 mi Thomas chuan, "Britain tan kum ṭha a ni a, mi hlawhtling tam tak an awm kara he chawimawina ka dawng thei hi ka lawm takzet," tiin a sawi. Award dawngtu hi mipuiin an thlan a ni a, Formula 1 world champion Lewis Hamilton leh England football captain Harry Kane te a khum.
Award langsar dang Coach of the Year atan Gareth Southgate thlan a ni. Kum 48 mi Southgate hian FIFA World Cup-ah khan an ram hi semifinal a thlenpui a, football inelna ngaihhlut berah hian kum 28 hnua a thiam pali zinga an tel lehna hmasa ber a ni hial - UEFA Nations League-ah semifinal a luhpui bawk.
England manager Southgate chuan, "Kan ramin player ṭha an ngah hle a, an rawn chhuak mek zel bawk, anni nena thawhhona hun kan hmang thei hi ka lawm. Hlawhtlinna sang ber kan la chang rih lo a ni mai thei, mahse infiamna hmangin midang kan cho phur nasa tih ka hria a, kan thil tum pakhat chu a hlawhtling tawh tihna a ni," tiin a sawi.
BBC Sports Awards
Sports Personality of the Year : Geraint Thomas
Team of the Year : England Netball
Coach of the Year : Gareth Southgate
World Sport Star of the Year : Francesco Molinari
Unsung Hero : Kirsty Ewen
Lifetime Achievement Award : Billie Jean King
Helen Rollason Award : Billy Monger