'The Sacked One' - United-in Mourinho an ban!

Manchester United manager Jose Mourinho-a'n inchhuang takin 'The Special One' tih hming inpe mah se nimin khan United-in an ban a, tunah chuan 'The Sacked One' a ni rih!

Mourinho hian United-ah kum hnih leh a chanve chhung hun a hmang hman a, League Cup leh Europa League nomawi chawipui hman mah se Old Trafford-a a hna chhanhim nan 'nomawi' an tling lo.

Manchester United chuan thuchhuah siamin, "Manchester United-a hun a hman chhunga a hnathawh avangin club chuan Jose hnenah lawmthu a sawi a, a hun lokal zel tur atan duhsakna a hlan a ni," an ti.

United chuan manager lailawk an ruat tur thu sawi nghalin, "Manager nghet tur kan zawn chhungin season tawp thleng atan manager lailawkin he team hi a kaihruai dawn a ni," an ti a, manager lailawk tur hming erawh he thu buatsaih a nih thleng hian an la puang lo.

Mourinho hmunruak

Kum 55 mi Mourinho ban a nih rual hian manager lailawk turin assistant coach Michael Carrick leh academy boss Nicky Butt te hming lam rik ni mah se an ni dawn lo tih a chiang tawh bawk.

Red Devils hian club pawn lam ami manager lailawk tur hian ruat an tum a, Arsenal boss hlui Arsene Wenger hming sawi rik ni mah se a ni dawn lo chiang a, tun dinhmuna ri ring ber chu Laurent Blanc a ni.

Kum 53 mi manager hi player a nih laia Manchester United tana lo khel tawh a ni a, Bordeaux, France leh Paris Saint Germain lo enkawl tawh a nih avangin a tawnhriat pawh a iaiawm loh hle.

Hetihlai hian manager nghet tur an inrinsiak mek bawk a, Zinedine Zidane, Diego Simeone, Leonardo Jardim leh Mauricio Pochettino te hming a ri ring hle.

Engvang nge?

Manchester United hian an league match hnuhnung berah 1-3 in Liverpool an ngam lo a, Premier League hmahruaitu an hmelma kumhlun hi point 19 ngawtin an thlau zui.

Premier League-a beisei an phak loh hi United-in Mourinho an ban chhana lang chiang ber a ni a, hetihrual hian player nena an inkar boruak ṭha lo chu an ban chhan lian tak a tling bawk.

Mourinho hian pound maktaduai 89-a Paul Pogba a lei khan a chhiatna tur a lei tel tih a inhre kher lo ang - mahse a bik takin Pogba nena an inkar boruak ṭha lo hi ban a nih chhan lian tak zingah a tela ngaih a ni.

Attacking football khelh a duh thu a sawi avanga Mourinho-a'n vice captain a nih tawh loh tur thu a sawi Paul Pogba hian Mourinho ban a nih hnu lawkah twitter lamah hriatthiam theih tur takin a thlalak a pholang a, a hnuah erawh hmuh zui tur a awm lo.

Ban man a to!

United-in Mourinho an ban a, he thil ti tur hian an ngaihtuahna an seng nasa hle ang tih a lang chiang - United hian Mourinho an ban avangin pound maktaduai 22.5 zet an pek a ngai!

Mourinho hian July 6, 2016 khan Manchester United a zawm a, Manchester khawpuiah hian five star hotel Lowry Hotel-ah a khawsa a, a hotel bill chu £537,000 ngawt a tling.

Portuguese manager chenna hotel hi zan khat riah man ringawt pawh £600 (Rs. 53,663) a ni a, a hlawh piah lama United-in sum an sen hi a tam tham hle.

Hetichung hian an beisei ang result a pe thei lo a, player te nen an inhmu thiam lo a, player lei nan pound maktaduai 300 chuang a seng chungin chhuan tham sulhnu a hnutchhiah lo - ban a ni hi a awm lo hran lo.

United-a Mourinho player lei te:
Hming Leina Club Man Zat
Eric Bailly Villarreal £30m
Zlatan Ibrahimovic PSG Free
Henrikh Mkhitaryan Borussia Dortmund £26.3m
Paul Pogba Juventus £89m
Victor Lindelof Benfica £31m
Romelu Lukaku Everton £75m
Nemanja Matic Chelsea £40m
Alexis Sanchez Arsenal Swap (Mkhitaryan)
Diogo Dalot Porto £19m
Fred Shakhtar Donetsk £47m
Lee Grant Stoke £1.5m

Mourinho-a'n United-ah kum hnih leh a chanve chhungin player 11 a lalut hman a, a sum insen zat chu pound maktaduai 358.8 a ni.