Jacob leh Zakhuma ten medal an la

14th National Youth Sub Junior Boys & Girls and 55th Men & Women Junior National Weightlifting Championship neih mekah Mizo hming a mawi leh ta. Mipa 61kg huangah Jacob Vanlaltluanga chuan gold medal a chawi chhuak a, pahnihna chu Zakhuma a ni thung.

Inelna ni Nagpur, Maharashtra-ah neih niin Jacob-a hian snatch (112kg) leh clean & jerk (138kg) chawiin pakhatna dinhmun a luah. Govt. Complex rawlthar hian Youth leh Junior huang chhungah amah tluktu a tawng lo.

Jacob-a leh Zakhuma te hi Jeremy Lalrinnunga te nena weightlifting luhchilh rual an ni a, anni bakah hian Thutak Nunpuitu Team (TNT) aṭanga chhuak Lalhunthara chuan national level bika a medal hmasa ber ni turin silver medal a la ve bawk.

Mizo lifter pathumte hi Army Training Institute, Pune-a awm lai vek an ni. Hmeichhe zinga medal la awmchhun ni turin Vanlalrinmawii chuan 49kg huangah bronze medal a la ve bawk. Lungchhuan nula hi SAI, Mission Vengthlanga awm lai niin; Indian ram pum huap inelna bika a medal hmasa ber a chawi chhuak a ni.

Inelna hi December 22 thleng neih tur a ni dawn a, Mizoram team hi manager Zohmangaiha (MSSC) leh coach Praveen Kumar (SAI) ten an hruai.

Mizo medal late
1 Jacob Vanlaltluanga 61kg Gold
Snatch : 112kg
Clean & Jerk : 138kg
Total : 250kg
2 Zakhuma 61kg Silver
Snatch : 116kg
Clean & Jerk : 130kg
Total : 246kg
3 Lalhunthara 61kg Silver
Snatch : 99kg
Clean & Jerk : 123
Total : 222kg
4 Vanlalrinmawii 49kg Bronze
Snatch : 65kg
Clean & Jerk : 77kg
Total : 142kg