Poch-a'n Arsenal hneh a tum

Mauricio Pochettino enkawlna hnuaiah Tottenham Hotspur hi European team hlauhawm zingah an tel phak tawh a, mahse nomawi an la chawi lo. Argentine manager hian Carabao Cup an chawi theih nan an hna hmasa atan Arsenal hneh an tum thu a sawi.

Zanin dar 1:15 hian Emirates Stadium-ah Arsenal leh Tottenham ten League Cup quarterfinal an khel dawn, tun thlatir mai khan North London Derby hi khelh a lo ni tawh a, Gunners lamin 4-2 in hnehna an chang - Premier League anga inelna ngaihhlut ni lo mah se League Cup hi a hmuhnawm tho ang.

Nomawi a ngai

Premier League-ah club ṭha an tam a, eng inelna pawh nomawi chawi a awlsam lo. Mauricio Pochettino pawhin a harszat zia a hai lo, Argentine manager chuan, "Champion kan duh, Arsenal laka hnehna kan chan lawm hlan kan nghakhlel tawh," tiin a sawi.

Kum 46 mi Poch chuan Gunners chungchang sawi zuiin, "Hmanni lawkah kan inhmachhawn a, a chak lo zawkah kan ṭang. Khami ṭum khan kan phu tawk ang zahna kan dawng lo, dinhmun chhe zawk kan ṭan hnu khan hnuaichhiah kan ni," a ti.

Emirates Stadium-a buaina a chhuah ṭum khan Poch-a hi a ṭhelh turin a tlan chhuak hial, zaninah buaina a chhuak leh a nih chuan a ngaihdan a dang tawh mai thei. Spurs hian hliam vangin - Eric Dier (rilphir), Mousa Dembele (kephah), Victor Wanyama (khup), Jan Vertonghen (malpui) leh Vincent Janssen (kerek) te an chhawr thei dawn lo.

Thawh an tum

Southampton laka an tlawm hnuah Arsenal manager Unai Emery chuan, "Tun anga kan khel a nih chuan team dang pawh kan hneh thei lo ang," a ti hial a, match 22 chhung tlawm loa an kaltluan hnua Saints an hneh lo chu a la na hle - Spurs lakah ropui zawka thawh leh nghal an tum ang.

Arsene Wenger hunlai aṭang tawhin Arsenal hian League Cup hi an dahsang ngai lo, player naupang rual khelh tir nan an hman ṭhin avangin 1993 hnuah an la champion leh miah lo a ni.

Spanish manager Emery-a'n, "EPL kan ngaipawimawh ber a, chumi hnuah a dang kan ngaipawimawh bawk," tiin a sawi tawh. Gunners hian Inrinni zanah table mawng lama talbuai mek Burnley an mikhual zui dawn avangin zanin player ṭha ṭhenkhat an hahchawl a nih pawhin a mak lo ang.

Hazard a chiang lo

Chelsea chuan zanin dar 1:15 tho hian Stamford Bridge-ah Bournemouth an mikhual dawn a, season kal laia an player ṭha bera chhal ngam Eden Hazard chu a inlan theih a beisei awm loh - striker Alvaro Morata a hliam bawk avangin Olivier Giroud chu tlarhma lama an hmachhuan tur a ni dawn.

Belgium international Hazard hian tun season EPL-ah goal riat a khung tawh a, kar tawpa Brighton an hneh ṭum pawhin goal a khung bakah assist a nei bawk. Mahse, hun tawp dawnah an nghawk avangin thlak a ngai.

Italian manager Sarri chuan, "Eden chung-chang hi doctor nen kan sawidun tawh a, ni thum vel bak chawlh a ngai lo ang," a ti. Team pahnih dinhmun thlir chuan Hazard tel lo pawhin Blues hian hnehna an chang thei tura ngaih a ni.