United enkawl lailawk tur Solskjaer

Manchester United chuan Jose Mourinho thlak nan 1999 Champions League final-a Bayern Munich lama chakna goal khungtu Ole Gunnar Solskjaer chu tun season tawp thlenga caretaker manager hna chelh turin an lalut.

Norwegian manager chuan, "Man-chester United hi ka thinlungah a cham reng a, hetiang hna pawimawh chelha ka let thei hi a ropui ka ti hle," tiin a hna thar turah a phur thu a sawi.

Naute hmel a an vang leh goal a khung theih vanga Baby-faced Assassin tih ṭhin Solskjaer hi Sir Alex Ferguson-a thachhang dawltu hna chelh ṭhin Mike Phelan-a'n a zui a, Mourinho coaching staff zinga mi Michael Carrick leh Kieran McKenna te an la awm dawn.

Boruak ṭha
United executive vice-chairman Ed Woodward chuan, "Ole hi club legend a nih bakah player leh coach angin tawnhriat ṭha tak a nei a. Manchester United chanchinah a bet tlat a, he club hi a hrechiang em em a, club chhunga awm te pawh a rawn let hi an lawm a. Amah ang bawka club chanchin hre ṭha sa Mike Phelan a rawn let bawk," tiin team enkawltu thar chu mi thar an nih loh thu a sawi.

Team boruak ṭha zawk beiseiin Woodward chuan, "Season chawnhnu lam kan hmachhawn turah hian player leh fan te inkarah thawhhona ṭha a siam theih hi kan ring tlat a ni," tiin result aiin team inlungrualna an ngai pawimawh hmasa niin a lang.

Club hrechiang
Manchester United ṭantute Sir Alex Ferguson-a awm loh hnuah David Moyes leh Louis van Gaal te an hlawhchham a, manager hming lian Jose Mourinho pawh a danglam bik lo.

Tun season-ah United-in Champions League knockout stage thleng mah se League Cup aṭangin an tla tawh. Premier League-ah an hmelma City leh Liverpool an ngam lo a, league match 17 khelh zawhah United-in Jurgen Klopp-a hote an phak lohna chu point 19 zet niin parukna chauha an awm avangin thlak danglam an mamawh.

United-in team siam ṭha turin an ropui hun laia an player pawimawh Solskjaer ah 'risk' an la a, kum 45 mi Norwegian manager hi United player leh assistant manager hlui kum 52 mi Phelan-a'n a zawm tel avangin thutlukna mawlmang niin a lang lo thung.

Tu nge Solskjaer?
Ole Gunnar Solskjaer hian Manchester United-ah season 11 zet khelin match 366-ah goal 126 khung mah se football khelh a chawlhsan pawh kum 2007 daih a nih tawh avangin United legend hi rawlthar tan chuan hriat loh theih a ni. Amaherawhchu football tuipui rual u zawk chuan Bayern Munich lama a goal avangin an hre reng dawn a, Nou Camp-a inlehthalna kha infiamna khawvela 'comeback' ropui ber zinga mi a ni.

Solskjaer hian football khelh a chawlhsan hnuah United reserves team hlawhtling takin kum thum chhung a enkawl a, hemi hnu hian a larchhuahna club Molde a enkawl a, an ram league 'Eliteserien'-ah season thum enkawlin ṭum hnih a champion pui a, Nor-wegian Football Cup-ah ṭum khat a champion bawk.

Molde-a a hlawhltinna avangin Premier League club Cardiff-in an sawm a, amaherawhchu Welsh club hi a hlawhtlinpui lo a, a relegate pui avangin an ram club-ah bawk a let. A inzir chhuahna Clausenengen Under 19 team season hnih a enkawl hnuin Mode-ah bawk a kir a, heta ṭang hian United-in an la chhuak.

Norway-ah chuan tun hi an season chawlh lai a ni a, nakkum March-ah an ṭan chauh dawn. Molde club thuchhuakah chuan Solskjaer hian United-a a hna a zawh hunah a let leh tur thu tarlan a ni a, United manager nghet tur an inrinsiak chho zel ang. Norwegian club chief executive officer Oystein Neerland chuan, "Molde tan chuan hun ṭha a inher chhuakah kan ngai a, kan tan khawvel football-ah kawng a inhawng zau sawt," tiin a sawi.

Solskjaer hian Inrinni zan dar 11:00 hian a club hlui Cardiff City chu an mualah an hmachhawn dawn a, boxing day (December 26) ah Old Trafford-a an match hmasa ber an khel ang a, United-in Huddersfield an mikhual ang.

Solskjaer chungchang leh a chhehvel
Mike Phelan a rawn let thei hi a lawmawm. David Moyes-a tihsual hmasa ber chu Phelan a ban kha a ni a, club chhunga mi tam tak a tihhnual phah. Tun ṭumah pawh hian player thunun kawngah Solskjaer aiin a thawh hlawk ang. - Paul Hayward, Chief Sports Writer, Daily Telegraph

Manchester United hian Molde aṭanga Solskjaer hawh nan hian Norwegian club hi pound maktduai 1.8 an pe a, a ngheta an lalut dawn a nih chuan pound maktaduai riat an pek belh leh ang. - The Mirror

Solskjaer an lalut hi thlirna hrang hrangin a teh thei a, ka tehna aṭang chuan Manchester United hian bul ṭan ṭhat an tumah ka ngai nghet tlat a, tun hmaa thil ṭha kha a rawn tela ngaihna ka nei bawk. Zan lamah Manchester United ṭantu kan bia a, min chhanna chu, "Tunah chuan United inkhel ka en leh tawh ang," tih a a ni a, United thuneituten Mourinho an lakluh chhan tak chu chak duh vang a ni a, nomawi an duh vang liau liau a ni.

Manchester United hi chak chauh a ni lo a, Alex Ferguson hnuaiah khan hlawhtling viau mah se he club hian kal dan phung bik an nei a, an kal dan hi an chhuang a, an club an dah sang a, an club chhunga awm ten nun dan phung an nei a, tun hnaiah chak an duh luat avangin kalphung tam tak an hloh. Solskjaer hi Cardiff-ah hlawhchham mah se Fergsuon khan a player ṭhahnem tak zinga manager ṭha ni tur zinga a beisei niin ka hria. Alex-a hian United thutluknaah hian thuneihna a nei a nih chuan Solskjaer hi manager tura a rintawk vang a ni a, amaherawhchu Old Trafford-a Stretford End (United ṭantu ruhkawlh awmna) a paltlang huna ṭawiawmtu ṭha tak a nei tur hi a pawimawh lai chu a ni. - Simon Stone, BBC Sport