Lionel Messi kutah Golden Shoe

Barcelona forward Lionel Messi kuatah European Golden Shoe award hlan a ni a, Catalan club tan hian Europe khawmualpuia season khat chhunga goal khung hnem ber nihna vawi nga lai mai a dawng thei chu a beisei phak loh thil a nih thu a sawi.

Season hmasa khan Messi hian La Liga match 36 a khelh aṭangin goal 34 a khung a, goal 32 khungtu Liverpool forward Mohamed Salah chu amah hnaih bertu a ni. Messi hian 2009-10 (34 goals), 2011-12 (50), 2012-13 (46) leh 2016-17 (37) te khan he chawimawina hi a lo dawng tawh bawk a ni.

Tun hnai kum 10 chhung vel chu Messi leh Cristiano Ronaldo ten football huanga mimal chawimawina langsar an hui kim deuhthaw anga sawi theih a ni a, tun ṭuma Messi-a'n award a lak leh takah chuan vawi li la tawh Ronaldo a khum nghal.

Kum 31 mi Messi chuan, "A nihna takah chuan he chawimawina vawi nga dawn hi chu ka suangtuah phak ngai lo. Professional football khelh a, nuam ti taka hun hman hi ka duhthusam a ni ṭhin a, hei baka thui chu ka ngaihtuah ngai bik lo," a ti, Catalan club tan hian match 655 aṭanga goal 572 khungin goal khung hnem ber a ni.

Messi leh Salah te hnungah hian Harry Kane a awm, Tottenham striker hian season hmasa khan Premier League-ah goal 30 a khung. Real Madrid forward hlui, tuna Juventus player ni ta Ronaldo chuan La Liga season hnuhnungah khan league match 27 aṭangin goal 26 a khung ve bawk.

Tun season kal laiah pawh Messi bawk a chungnung mek, Argentine forward hian goal 14 khung leh tawhin a vawi ruk nan Golden Shoe award dawng thei tura rinkai a ni leh mek.