IPL Auction - Hriat loh val Varun man a to!

India rama club cricket inelna ngaihhlut hlawh Indian Premier League chu March 29 - May 19 chhung hian khelh a ni dawn a, hriat hlawh lo Varun Chakaravarthy chu player manto ber a ni a, fast bowler Jaydev Unadkat nen an man zat a in ang.

IPL club ten an player duhzawng an chelh theih tawh avangin player langsar tam zawk chu auction-ah hian an tel lo a, Indian player langsar tak tak Virat Kohli, MS Dhoni leh Suresh Raina te chu club neisa zingah an tel.

Varun chu...

IPL auction-ah hian rin loh takin Varun Chakaravarthy chu player manto ber a ni a, a base price hi nuai 20 chauh ni siin Kings XI Punjab-in an chan meuh chuan nuai 840-in an chang!

Wicketkeeper-batsman anga a career ṭantu player hi spinner a ni a, Tamil Nadu Premier League 2018-ah Madurai Panthers tan a hming chherin October-a Vijay Hazare Trophy-ah khan wicket 22 lain wicket la hnem ber a ni bawk.

Jaydev pawh...

IPL auction-a Varun nena an man zat in ang chiah chu Jaydev Unadkat a ni a, Indian fast bowler hi a base price chu nuai 150 ni mah se Rajasthan Royals chuan nuai 840-in an chang.

Base price aṭanga chhut erawh chuan Jaydev hian Varun hi hlawh hnem lamah a tluk lo anga chhiar theih a ni a, hetihrual hian Varun ang lo takin hriat hlawh sa a ni a, India tan Test, ODI leh T20-ah a inlan vek tawh.

Tawnhriat ngah

Vaibelchhe 17 hial hlawha auction-a lei lo ni tawh Yuvraj Singh-a'n chuai lam a pan ve ta a, first round auction-ah lei duhtu hmu lo mah se second round-ah Mumbai Indians chuan vaibelchhe khatin an lei.

Indian player tawnhriat ngah zingah Ishant Sharma chuan nuai 110 hlawhin Delhi Capitals tan a khel dawn a, Mohammed Shami chuan Kings XI Punjab tan nuai 480 a hlawh ang.

Rampawn player

Indian player ni lo zingah English all rounder Sam Curran chu player manto ber a ni a, Kings XI Punjab chuan nuai 720-in an chang. Amah hnaih bertu Colin Ingram chuan Delhi Capitals tan nuai 640 a hlawh thung dawn.

West Indies all rounder Carlos Brathwaite chu ram pawn player zinga manto pathumna a ni a, Kolkata Knight Riders chuan nuai 500-in an chang.