De Bruyne telna City an chak

Carabao Cup champion lai Manchester City chuan season hmasa ang bawkin quarterfinal-ah Leicester City chu penalty shootout hmangin an hneh a, Pep Guardiola naute hian a kum zawnin semifinal an lut.

Thawhlehni zan King Power Stadium-a inkhelah Man City tana Kevin De Bruyne-a goal khung chu Foxes tan Marc Albrighton chuan sutin hun pang-ngaiah 1-1 a ni a, penalty an pet hnuh City keeper Aro Muric-a'n penalty vawi hnih dangin Oleksandr Zinchenko chuan 3-1 a an chakna goal a khung.

Hei le De Bryune

Premier League season ṭan nia Arsenal nen an inkhelh ṭumin Kevin De Bruyne a hliam a, November thla tir khan rawn kir mah se training-na lamah a hliam nawn leh. Belgium international leh striker Sergio Aguero te hliam an dam tawh, Foxes lakah pawh inkhel bul ṭantu zingah an tel.

Kum 27 mi De Bruyne-a'n khelmual chhungah a dam tawh tih a lantir a, defender Nicolas Otamendi hnen aṭanga a ball hmuh chu thununin Leicester midfielder Hamza Choudhury chu mawi zeta a thai bum hnuah yard 20-a hla aṭangin goal kilah a thlawh lut - keeper Danny Ward tan dan hman a ni lo.

Tun season League Cup bikah Leicester City lamin an goal chhuah hmasak ber a ni a, an dan theih loh hi De Bruyne a ni. Man City lamin an midfielder ball thiam, a huna ṭhiante pek thiam leh goal hma a buai lo an nei let leh ta hi thlamuanna tham a tling ang.

Riyad Mahrez-a'n a club hlui lakah goal khung theihna hun ṭha nei mah se Aguero ball pek a chhawr ṭangkai thei lo a, first half khel ṭha lo Foxes chu second half-ah an rawn tho chhuak thung. Minute 73-naah Wilfred Ndidi-a ball vawrh fuh tak mai chu box chhungah Mark Albrighton-a'n la thlain a hlap lut zui zat.

Penalty chu

Hun pangngaiah 1-1 a ni a, extra time khel loin penalty shoot out neih nghal a ni. Leicester City tan England international defender Harry Maguire-a'n khung nghalin, City midfielder IIkay Gundogan chuan a sut.

Foxes defender Christian Fuchs-a'n goal ban chunga a thlawh chhuah hnuah Man City keeper Muric-a'n James Maddison leh Caglar Soyunce te pet a dang a, Raheem Sterling-a'n ṭhelh ve bawk mah se Gabriel Jesus leh Zinchenko ten an khung thung.

Man City manager Guardiola chuan, "Raheem khan zawitein a chip a, goal lo mah se a pawina a awm lo e. Nikum khan Claudio Bravo vangin kan chak a, kuminah chuan Aro vang a ni ve thung," tiin a keeper a fak.

A harsa

Hnehna chang mah se Manchester City chuan tlang turin vanneihna an mamawh tel tih an hai bik lo. Manager Pep chuan, "Leicester City nen a nih chuan a awlsam ngai lo, player ṭhenkhat an inhliam a, kum 17 mi chauhte an luh a ngai bawk, chuti chung chuan game ṭha tak kan khel thei a ni," tiin a sawi.

City tana goal mawi khungtu De Bruyne chuan, "Hun rei tak chhung hliam vanga chawlh hnua minute 70 chhung ka khel ve leh thei ta hi ka lawm, player ṭhenkhat nen khan kan khel ho hnem tawk lo a, a harsat phah deuh. Team tana tha thawh theitu zinga ka tel leh thei hi a lawmawm, tunah chuan nomawi dang chawi leh turin match hnih chiah kan hmabak tawh," a ti.

A vawi khat nan Burton

Thawhlehni zan quarterfinal inkhel pakhat zawkah Burton Albion chuan midfielder Jake Hesketh-a goal khat hmangin Championship club Middles-brough chu 1-0 in an hneh a, League One club hian a vawi khat nan Carabao Cup semifinal an lut.

Burton Albion boss Nigel Clough, "Inelnaah hian team 92 kan inlan a, tunah chuan a thiam pali zingah Burton Albion kan tel thei hi a ropui takzet. Aston Villa, Nottingham Forest, Burnley leh Middlesbrough hneh hi a nep lo," tiin a sawi.

Middlesbrough erawh 2004 khan champion mah se a hnu lamah semifinal an la lut leh phak lo. Nizan khan quarterfinal hi match hnih khelh zui leh a ni bawk a ni.