Zlatan Ibrahimovic -a'n contract thar ziak

Zlatan Ibrahimovic chuan Major League Soccer (MLS) club LA Galaxy tan contract thar a ziak a, season leh chhung chu US-ah hun a hmang chhunzawm dawn tih a chiang ta.

Kum 37 mi Ibra hian Manchester United a chhuahsan hnuah nipui lai khan LA Galaxy hi a zawm a, a kum tam deuh tawh mah se khelmual chhungah chuan player hnawksak a la tling - match 27 a khelh aṭangin goal 22 ngawt a khung sak hman.

Swede striker hi Europe-ah a kir leh dawn nia sawi a tam, a club hlui AC Milan nen phei chuan an inhnim hnai hman hle nia sawi a ni. Mahse, Ibra hian, "Hna ka lo zo lo," tiin MSL-ah hna thawh tur a la neih thu a sawi a, hun tam pawh a liam hmain club lamin contract thar chungchang hi a puang zui ve leh nghal a ni.

LA Galaxy general manager Dennis te Kloese chuan, "Season thar atan Zlatan nena inremna kan nei thei hi kan lawm hle, season kan hman zawh takah khan kan tana a hlutna chu a pho chhuak tawh, kan hmabakah pawh thil ropui tam tak min tih sak ka beisei," tiin a sawi.

US lama a hun hmasa lamah Ibra hian a club hi Western Conference-ah pasarihna a nihpui a, an beisei angin playoff khel phak lo mah se season tharah chuan khelh phak ngei an tum tawh ang.