Mizoram Premier League 7 mimal lawmman thlirletna

Best player leh best midfielder Alfred
Aizawl FC captain Alfred Kemah Jaryan hi Mizoram Premier League-a foreigner zinga best player leh best midfielder dawng thei hmasa ber a ni a, mimal chawimawna hrim hrimah erawh MPL3-ah khan Aizawl FC defender Emmanuel Chigozie chu best defender-ah thlan a ni.

Liberian midfielder Alfred Kemah Jaryan hian I League ṭan hma match hmasa pariat a khel kim vek a, hemi hnu hian mamawh dan a zirin bench aṭanga luhtir ṭhin a ni a. Semifinal first leg-ah bench aṭanga lutin Mizoram Police lamah goal pawimawh a khung a, AFC coach Gift Raikhan-a'n second leg aṭangin an team captain hi bench-ah dah ngam tawh loin final thlengin a khel tluan vek.

Alfred hian Mizo club MPL3-a K. Malsawmkima hnuaia an champion zawh khan I League 2nd Division khel turin a zawm a, hemi zawh hian Spanish Manuel Retamero hoa MPL nomawi chawiin tun season ang thoin final-ah goal pawimawh a khung. Mizo club tana a khelhtir hian Alfred hi forward a ni a, amaherawhchu a chet ran tawk loh avangin Khalid Jamil-a hnuaiah midfielder niin I League nomawi an chawi ṭumin best mifielder-ah hial thlan a ni.

Gift Raikhan-a hnuaiah erawh midfield-ah khel tam mah se forward leh central defender hna thlengin a chelh vek a, Aizawl FC-in MPL-a vawi thum an champion theih nan thahrui pawimawh a ni a, goal nga a khung bawk.

Best midfielder nominee dang
Isak Vanlalpeka, Electric Veng
Lalrinchhana, Chhinga Veng
Lalromawia, Chhinga Veng
Vanlalthanga, Chawnpui FC

Fakzuala kutah Top Scorer chawimawina
MPL7-ah Mizoram Police forward Lalfakzuala leh Chhinga Veng forward MS Dawngliana ten goal riat ve ve an khung a, minute inlan tlem zawk Armed Veng tlangval Fakzuala kutah top scorer chawimawina hlan a ni.
Bawngkawn tlangval Dawngtea hian season ṭha tak a hmang a, semifinal china khelmual chhunga a hun hman zat chu minute 1170 a ni a, amah ang bawka goal riat khung Fakzuala aiin minute 36-in a khel tlem zawk. Amaherawhchu final khelh tur a la awm avangin top scorer tur a chiang lo.

Nomawi chawi tur zawnnaah Dawngtea hian first half-ah chance ṭha tak a nei a, keeper chiah a hmachhawn hnuah a pet goal lo. Chhinga Veng forward hian hun ṭha a bawhpelh a, hemi hnu pawh hian extra time khelh a nih avangin minute 30 goal khung theihna hun a nei leh a, goal a khung tak chuan loh avangin inkhel a tawp meuh chuan Fakzuala aiin minute 84-in a khel tam zawk.

Fakzuala hian season liam ta khan goal 10 khungin top scorer a ni a, tun season-ah goal riat khungin top scorer a ni leh a. Police tana a khelhpui Lalbiakhlua hnua top scorer chawimawina season zawna dawng thei hmasa ber a ni.

Hming Club Goal
Lalfakzuala Mizoram Police 8
MS Dawngliana Chhinga Veng 8
Lalnunzama Chanmari FC 6
Vanlalthanga Chawnpui 6
David Lalchhuanawma Electric Veng 6
F. Lalremsanga Aizawl FC 5
Alfred Kemah Jaryan Aizawl FC 5
Isak Vanlalpeka Electric Veng 4
Lalliansanga Ramhlun North 4
Laldampuia Chanmari FC 4
Lalromawia Chhinga Veng 4

Defender ṭha ber Samthang tlangval
Chhinga Veng defender PC Laldinpuia chu best defender atan thlan a ni. Samthang tlangval Dinpuia hi club tana a khelhpui Hmingthanmawia leh Vanlalzuidika te aia thlan ni mah se lawmman a dawn theihna chhanah erawh Chhingcows tlarhnung thawhhona ṭhat vang tiin a sawi theih ang.

MPL7-ah Chhinga Veng hian goal riat chiah an chhuah a, anmahni hnaih bertu Aizawl FC-in goal 17 an chhuah. Dinpuia hian tun season-ah match 14 khelin match 13 bul a ṭanah a khel tluan vek a, match khat bul a ṭan loh chhan pawh hi hahdam tura an duh vanga bench-a a an dah a ni a, mamawhna sang vanga luhtir leh zawk a ni.

Dinpuia tan tun hi MPL-a mimal chawimawina a dawn hmasak ber a ni a, football career ṭantirh lama forward-a chhawr ṭhin hi tharum a ngah avangin Mizo defender ṭha ber zingah chhiar tel a ni chho mek.

Best defender nominee dang
Hmingthanmawia, Chhinga Veng
Lalhriatenga (Achia), Aizawl FC
Vanlalremruata, Electric Veng FC
Vanlalzuidika, Chhinga Veng

T. Mawia hun a inher chhuak
Chhinga Veng keeper Zothanmawia hian club pathum Dinthar FC, Aizawl FC leh Chhinga Veng FC te a champion pui tawh a, best goalkeeper chawimawina a la dawng ngai lo. Tun season-ah T. Mawia hun a inher chhuak ve ta a, final-ah a club hlui Aizawl FC hneh lo mah se College Veng tlangval hi a vawi khat nan MPL best keeper-ah thlan a ni.

T. Mawia hian league round ṭantirh match hmasa pahnih a khel lo tih loh chu a inlan kim vek a. Match 14 a inlanah clean sheet vawi kua a nei a, man of the match-ah vawi hnih thlan a ni a, statistics a neih ṭhat bakah a ball sem ṭha tak chu best keeper a nih theihna chhan pakhat a niin a lang. Minute 1380 a inlan chhungin goal sarih chiah a chhuah a, record a nei ṭha hle. Final-ah pawh Chhingcows dinhmun ṭhat theih nan Paul Ramfangzauva penalty pet a dang a, nomawi an chawi phah loh avangin tun ṭuma a chawimawina dawn lawmawmna hi a famkim lo ang.

Best goalkeeper nominee dang
Lalawmpuia, Aizawl FC
F. Lalmuanawma, Mizoram Police
Lalrinnunga, Electric Veng FC
MS Dawngliana, Chanmari FC

Dawngtea a la chuai lo
Chhinga Veng final thlentpuitu forward MS Dawngliana hi MPL hmasa berah top scorer a ni a, ṭum hnihnaa Chanmari FC a champion pui ṭumin best forward a ni leh a. Hemi hnu hian Dawngtea hi MPL forward ṭha ber zingah chhiar tel ni reng mah se mimal chawimawina dawn beiseiawm khawpin a che ṭha tawh lo.

Tun season-ah erawh tun hmaa Dawngtea kha tawnhriat tam zawk nen a rawn inlar a, goal riat zet a khung a, hattrick siam awmchhun a nih bakah ṭum li man of the match-a thlan a nih avangin best forward chawimawina hi a phu takzet a. Bawngkawn tlangval hian tun season-ah match 14 khelin a inlanna hoah chuan inkhel bul a ṭan bakah a khel tluan vek.

Dawngtea hian a vawi hnih nan MPL best forward chawimawina dawng mah se Lalfakzuala aia a khelh zat minute a tlem vang chauhin top scorer chawimawina a dawng nawn lo. Mak ang reng tak chu tun season-a Dawngtea goal riat hi a ke dinglam vek aṭanga a khung a ni.

Best forward nominee dang
David Lalchhuanawma, Electric Veng
F. Lalremsanga, Aizawl FC
Lalfakzuala, Mizoram Police
Lalnunzama, Chanmari FC