Dortmund an tlawm ve ta
Bundesliga season kal laia hneh loh la tawng lo leh hmahruaitu ni bawk Borussia Dortmund chu a vawi khat nan an chak lo ve ta. Thawhlehni zan khan Dortmund hi Fortuna Dusseldorf lakah 2-1 in an chak lo a, point rukin hma an la hruai fal thei tho.
Chak lohna hmasa
Merkur Spiel-Arena-a inkhelah Dusseldorf tan Dodi Lukebakio leh Jean Zimmer ten chawlhlawk hmain goal an khung a, table mawng lama talbuai hian an beisei aia ṭhain inkhel bul an ṭan ngeiin a rinawm.
Season duhawm hmangtu Dortmund lamin beisei angin si phurh an sut mai thei lo. Substitute Paco Alcacer chuan minute kua chauh a awm tawh tihah si khat sut ve mah se goal dang a lut tawh lo.
Kum 25 mi Alcacer hian tun season chhungin bench aṭangin goal 10 a khung tling der tawh a, Bundesliga huang bikah season khat chhunga substitute goal khung hnem ber a ni nghal der - season chanve pawh an la hmang tling lo a ni.
An chak loh avangin Dortmund hi an hmahruaina a tlahniam, an hnuai chiaha awm pahnihna Borussia Monchengladbach chuan a hniam ber dawta awm Nuremberg chu 2-0 in an hneh thung a ni; an inkarah point kua awm kha point ruk chauh a ni ta.
Favre thukhawchang
Dortmund manager Lucien Favre chuan, "Inrintawkna kan nei sang em a, tun ṭum chu kan inring sual deuh a ni. Kan elpui team khan thapui an thawh tih chu ka hria, min beihna tur pawh hre reng mah ila kan inveng thei ta lo a ni," tiin a sawi.
Bayern Munich laka hattrick siam tawh Lukebakio chungchang sawi zuiin Favre chuan, "Ani kha ven a ngai tih kan hria, mahse ven sen a ni lo. Ka naute khelh danah demna tur ka hre hran lo a, a rang thei ang berin kan tho chhuak nghal ang," a ti. A rawlthar defender rual Manuel Akanji (22years), Abdou Diallo (23) leh Dan-Axel Zagadou (19) te chu dem theih an nih loh thu a sawi bawk.
Dortmund hian thlasik chawlh an hman hma an match hnuhnung ber atan Zirtawpni zan hian Signal Iduna Park-ah Monchengladbach an mikhual zui leh nghal dawn a, hnehna an chang thei a nih chuan an inkar a zau leh ang. Chutihrualin champion lai Bayern Munich-in hnehna an chang zel a nih chuan pahnihna niin point ruk bakin Dortmund an sang fal thei bik chuang dawn lo a ni.