Cavs chak ve leh ta

Cleveland Cavaliers chu a zawna match hnih an tlawm hnuin an chak ve leh ta. Nimin zing NBA regular season inkhelah Cavs hian Indiana Pacers chu 92-91 in an hneh a, season kal laia vawi riat an chakna chiah a ni.

Cavs hian an player ṭha LeBron James awm loh hnuah ngai an la awh leh thei lo a, Eastern Conference lama pathumna ni lai Pa­cers lakah pawh chak lo zawk tura ngaih an ni.

Mahse, Cleveland hian an player ṭha pathum - Kevin Love, Jordan Clark­son leh Tristan Thompson te tel lo pawhin hnehna an chang thei ta zawk a ni; quarter pali an khelh zinga pathumah an chungnung thei nachungin an chakna zat hi point khat chauh a ni - team pahnih zingah kalfal thei an awm lo.

Cleveland Cavaliers hian regular season match 31 an khelh tawh zinga ṭum 23 ngawtah an chak lo a, team 15 inelna Eastern Conference table-ah 13-na an ni mek. Season tawpah a sang pariat chin chauhin playoff an khelh dawn avangin playoff khel tur chauh pawhin hmasawn an ngai nasa tawh hle.