Toni Nadal-a'n Federer a dah sang
Rafael Nadal-a'n hlawhtlinna a chan theih nana mi pawimawh tak pakhat Toni Nadal chuan Roger Federer a dahsan thu a sawi a, kum upat tawh lama khelh dan phung
=ṭha tak a nei zel thei chu fak a phu hle tih a sawi bawk.
Tennis khawvelah chuan Nadal leh Federer te hi player ṭha chungchuang bik an ni, an intawn tawhna hmasa lamah chuan Nadal a chungnung hle. Mahse, 2014 hnu lama an intawn lehna panga - Australian Open, Basel, Indian Wells, Miami leh Shanghai Masters-ah te Federer a chak vek thung.
Nadal-a coach leh patea ni bawk Toni Nadal chuan, "Federer hi kum 35 a tlin hnuah pawh hma a sawn zel a, tun hnai kum li chhung vel kan thlir a nih chuan a inkhelah hmasawnna tam tak hmuh tur a awm tih kan hre thei ang.
"A vanglai khan Rafa nena inkhelh hi harsa a ni ṭhin, tunah erawh a chak loh ṭhinna thuruk kha hriain an intawn hnuhnung pangaah a chak vek. Roger hian court chhung leh pawnah player dangte tana entawn tur thil tam tak a hnutchhiah a, ani ang hi chu an awm leh tawh ngai dawn lo," tiin an elpui ber ni ṭhin a fak.