Leipzig leh Werner zinkawng a tawp hnai

Timo Werner-a'n RB Leipzig chhuahsanin Chelsea a zawm dawn a, German club leh Werner te hian competitive match hnih chiah an khel tawh dawn. Leipzig hian zanin dar 7:00 hian Borussia Dortmund an mikhual dawn a, Werner-a khelhna team hian Champions League ticket nei turin chak an la mamawh a, inkhel pawimawh a la ni.

Zanin dar 7:00  hian Bundesliga match kua an khel rual vek dawn. Champions League khelh la inbeisei Bayer Leverkusen leh Borussia Mochengladbach ten Hertha BSC leh Paderborn te an tlawh dawn a, chetsual a thiang tawh lo.

Covid-19 vangin khawvel a buai a, football club tam tak tlachhe thei dinhmunah an ding. Hetiang buaina karah hian Blues-in Werner an lalut a, Germany international forward vang hian London club-in pound maktaduai 102.5 bawr vel an sen a ṭul dawn.

Hei chauh hi a ni lo a, Chelsea lakluh thar Werner hi English club dang pawhin an ngaihven. Liverpool nen an sawi zawm a, Bayern Munich leh Manchester United hming a rik tel bawk avangin Werner chanchin chhut zui hi a ṭul a ni.

Chelsea an rawn lan hmain Liverpool thawm a ring ber a; Jurgen Klopp leh Werner pawh vawi tam tak whatsapp chat hmangin an inbia a, vawi hnih an inhmuh bawk avangin Anfield-a kal ngei tura ngaih a ni.

Werner lalut tur hian sum a ngaih tam bakah khelhna hun tiam tel a ṭul avangin Mohamed Salah, Roberto Firmino leh Sadio Mane nei tan thil theih a ni lo. A release clause pound maktaduai 45 (BBC ziah dan - website dang ziah dan a dang) lah Liverpool tan a tam lutuk deuh a, RB Leipzig dil tlawm an tum.

Amaherawhchu RB Leipzig chief executive Oliver Mintzlaff chuan, "Kan hnuaia kum khat dang contract la nei chu an man phu tawk aia tlawmin hralh kan tum lo a, a man hi a tlawm belh dawn lo," tiin chiang taka sawi avangin Reds tan inhnukdawk mai loh chu tih theih dang a awm lo.

Leipzig manager Julian Nagelsmann lahin Werner chhuah loh dan a zawng ve reng si. Season liam ta khan Bayern Munich nen sawi zawm a ni a, amaherawhchu Bavarians hian pound maktaduai 22 man a phu pha loah an ngai.

Nipui transfer tawp hmain Werner-a'n kum thum dang contract a ziak nghal a, Leipzig-in player hralhna sum an hmuh theih nana ziak a ni. Liverpool ang thoin club lian dang Manchester United leh Atletico Madrid te nen German club chhiarna man zatin an ngam bik lo.

Hetiang boruak karah hian Roman Abramovich erawhin sum ṭhahnem tak a theh chhuak ngam thung. Werner hlawh atan hian kar khatah £175,000 pek an tiam a, German club tana a hlawh let vel a ni a, a agent Karlheinz Forster hnenah pound maktaduai 12 an pe tel dawn bawk. 

Chelsea hian Werner atana an sum sen tur zawng zawng hi pound matkaduai 100 chuang a ni a, hei hi Germany international an lakluh theih chhan ber a ni. Chutihrualin manager Frank Lampard nen an inkawm tih hriat a ṭha a, English manager hian hmun pawimawh a chan tur thu a hrilh ngeia hriat a ni.

RB Leipzig hian Champions League last 16-ah Tottenham Hotspur chu aggregate-ah 4-0 in an hneh a, quarterfinal khelh tur an la nei. Amaherawhchu Champions League hi August thlaah khelh chhunzawm a ni chauh dawn a, Werner hi Chelsea player a nih tawh dawn avangin RB Leipzig tan a inlan tawh lo ang.

Werner hi Bundesliga match hnihah an la chhawr thei a, zanina Dortmund an mikhual bakah June 27-a Augsburg an tlawh hunah a ni ang. Kum 24 mi German forward tan Champions League khel tura RB Leipzig hruai thlen chu a tih theih hnuhnung a ni tawh hmel a, Dortmund an khelh hunah pawh en bik a hlawh dawn.

Thawhlehni kha chuan RB Leipzig boss Nagelsmann chuan, "Kan player a ni a, Champions League-a ka game plan-ah pawh a la tel. RB Leipzig tana a pawimawh dan hi sawiin a siak lo," tiin Werner chungchang a sawi a, tunah erawh thu thar a awm a nih ngawt loh chuan Bundesliga-ah match hnihah chuah a hmang thei tawh ang.

Bayern Munich    7:00 PM    Freiburg

RB Leipzig    7:00 PM    Borussia Dortmund

Hoffenheim    7:00 PM    Union Berlin

Fortuna Dusseldorf    7:00 PM    Augsburg

Hertha BSC    7:00 PM    Bayer Leverkusen

Mainz 05    7:00 PM    Werder Bremen

Schalke 04    7:00 PM    Wolfsburg

FC Cologne    7:00 PM    Eintracht Frankfurt

Paderborn    7:00 PM    Borussia M'gladbach