Fraser a inkhel tawh lo ang - Howe

Premier League club Bournemouth manager Eddie Howe chuan contract tawi ziak ve duh lo Ryan Fraser chu a chhawr dawn tawh lo tih a sawi chiang - Fraser tan dam reng chungin a season a tawp tihna a ni.

Kum 26 mi Fraser hian June thla chhung daih chauh hi contract a nei tawh, season dang ang chu ni se league an khar fel hman ang. Mahse, kuminah Covid-19 vangin league khelh chhung a rei a, player ṭhenkhat chuan tun season bik atan contract hi an pawtsei.

Howe chuan, "Fraser khan club tana a match hnuhnung ber a khel tawh, legaue match khelh hmabak pakua kan la neihah a inlan ve tawh lo ang. Tla thei dinhmunah kan ding mek a, kei chuan an theihna zawng zawng club tana hlan chauh ka mamawh.

"Club-in hun harsa kan tawng a, tun ṭuma kan buaina ang phei hi chu tun hma lama la thleng ve ngai lo a ni. Player zawng zawng zawng an theihna hlan turin ka duh; Ryan hi kan duh a nih chuan June thla a khelh tur match pahnihah a inlan thei, mahse kei chuan match pakua atana rilru pe chauh a ni ka duh," a ti.

Fraser hian 2013 khan Bournemouth chu League One aṭangin Championship-ah a inhlankai pui a, season hnih hnuah Premier League khel turin a tlin pui leh - English football inelna sang berah hian match 120 a khelhsak hman.

Kum 18 mi a nih lai aṭanga a enkawl tawh Fraser chungchang sawi zawmin Howe chuan, "Ryan nena hna thawh kha a nuam, a hmasawn dan thlir phei chuan a hlimawm ṭhin takzet. A hun tawp hi hetianga hman hi a phu lo, mahse loh theih lohna vangin kan duh loh dana season a khar a ngai ta zawk," a ti.

Coronavirus vanga EPL an chawlh lailawk hma khan Bournemouth hi table-ah 18-na an ni a, season thar atana inhamtang tur chuan hmasawn an ngai. Zanin dar 12:15 hian Fraser-a tel loa an match hmasa atan Crystal Palace an mikhual ang.