Ole Gunnar Solskjaer-a'n inkhel hmuhnawm chhawp chhuah tum

Manchester United manager lailawk Ole Gunnar Solskjaer chuan Jose Mourinho hmunruak a chelh hnuah "player ten football khelh nuam tihna neih let tir ka tum ang" tiin a sawi a, zanin dar 11:00 hian khualmualah Cardiff City an hmachhawn nghal dawn.

United hi an hmelma Liverpool laka mualpho hlim an ni a, chutihrualin he team hian Mourinho hnuaiah ringawt pawh pound maktaduai 400 tling thuak player lak nan an hmang avangin Premier League kai thar laka point thum hlawh chhuak turin squad a chhah ṭha tawk. Portuguese manager hian sum hmang hnem chunga result ṭha a neih loh avang leh a khelh dan hmang a thlak duh loh avangin a hna a chan tiin a sawi theih a, chuvangin Solskjaer hna hmasa ber chu hmuhnawm zawka United khelhtir a nih a rinawm.

Kum 45 mi Solskjaer chuan, "Player te football khelh nuam tihna neih let tir ka tum dawn a, supporter-te pawhin kan game khelh dan hmang an ngainat thuai ka beisei tlat a ni. Mahni in ngeia rawn let ang mai ka ni a, a phurawm takzet. Tunah chuan thil kal tawh theihngilhin a bul aṭangin kan ṭan ṭha dawn a, hnehna chan hi ngaiah kan neih a ngai a, nomawi beiseia kan khelh a ṭul a ni," tiin a sawi a, fiamthu pahin result ṭha an neih loh chuan supporter-ten an ngaihnat reng loh tur thu a sawi bawk.

Norwegian manager hian kum 2014 khan Cardiff hi a enkawl tawh a, Welsh club hi thla riat chung lek a enkawl chungin Premier League aṭangin a tlak pui a, Championship-ah bul a ṭan ṭhat pui loh avangin ban a tawk. Solskjaer chuan, "Tihsual kan ngah pauh leh thil zir thar kan ngah a, ka football zin kawngah hian tihsual tam tak ka nei tawh a. League nomawi ka chawi tawh a, cup nomawi ka chawi tawh a, ka relegate tawh bawk a, chuvangin ka hna chelh hi ka hrechiang a ni," tiin a sawi a, United manager thar hian a lar chhuahna Molde chu Norwegian league vawi hnih leh Norwegian Cup vawi khat a champion pui a ni.

Solsjkaer hi Mourinho coaching staff zinga mi Michael Carrick leh Kieran McKenna ten an pui dawn a, Sir Alex Ferguson hnuaia assistant hna thawk ṭhin Mike Phelan chu a thachhawng dawltu ber tur a ni. United manager lailawk chuan, "Tawnhriat a nei ṭha em em a, football a hriatna zau tak hian hahdamna min pe a ni," tiin amah lo enkawl ṭhintu Phelan a fak.

United legend chanchin ziahna 'The Baby Faced Assasin' tih buah chuan Mike Phelan hian, "Player tam tak chu bench-a an awm hian an ṭawng a, fiamthu an thawh ṭhin. Ole erawh mual sir aṭangin uluk takin inkhel a zir a, a khingpuite chak lohna lai a thlir ṭhin a, manager-in khelhna hun a pek chuan a lo inpeih tawh ṭhin hle," tiin a enkawl ṭhin a Ole Gunnar Solskjaer a fak a, an inhriat chian sa avangin team enkawl hna thawh dun pawh a awlsam sawt ang.

Manchester United-in Cardifff City an tlawh hnuhnun ber chu kum 2013 daih tawh kha niin Sir Alex Ferguson-a enkawl lai ni mah se 2-2 in an inhnehtawk a, Old Trafford-a an mikhual ṭumin 2-0 in hnehna an chang thung. Blue Birds hian Neil Warnock kaihhruaina hnuaiah season liam ta khan Championships aṭangin playoff khelh ngai loin an rawn tling nghal a, season bul ṭan ṭha lo mah se tunah an insiamrem leh tawh avangin an mualah chuan point hloh theihna tur an ni.