100% in ka dam - Neymar

Paris Saint-Germain forward Neymar chuan hliam neuh neuh vanga inkhelh theih loh chang nei mah se, tun dinhmunah chuan duhthusam in a dam ṭhat thu a sawi chhuak.

Brazil international hian tun season chhungin inelna hrang hrangah match 19 a khelh aṭang­in goal 16 a khung tawh; French club hi Champions League group stage a paltlangpui tawh bawk.

Kum 26 mi Neymar chuan, "Ṭhiante nena ka inkhel ve leh thei tawh tur hi ka lawm. A nihna takah chuan World Cup aṭanga tlak bakah hliam neih chu a hrehawm duh hle, mahse hetiang hun harsa tak paltlang hian puitlinna kawngah min pui ṭhin. Season bul ṭan kha a awlsam lo hle a, kum tawp lamah chuan ṭha leh zual zawka khelh theih ka inbeisei," a ti.

Footballer manto ber Neymar hi a hun hmasa lamah a teammate Edison Cavani nen penalty pet chungchangah buaina an nei a, tunah erawh Uruguay international nen hian indip buai loin an inkhel thei nia ngaih a ni.

Neymar chuan, "Pla­yer tin kan hlim tlang vek, goal khung kawngah kan induhsak em em a, nuamti takin kan khingpui goal kan nawr tlang ṭhin a ni," a ti. Cavani bakah rawlthar duhawm Kylian Mbappe chu khelhpui nuam a tih thu a sawi tel bawk.

Ligue 1 champion leh hmahruaitu ni bawk PSG hi tun hnaiah tualchhung buaina vangin an league match hnuhnung pahnih an khel thei lo, Inrinni zan dar 1:30 hian Nantes nen an inhmachhawn ang.