Asian player thiam zingah Sunil Chhetri
Asia khawmualpuia footballer tana chawimawina ngaihhlut hlawh Titan Sports’ Best Footballer in Asia 2018 chu thlan a ni leh dawn ta a, he chawimawina dawng thei tura hming 24 chhawpchhuah zingah India captain Sunil Chhetri chu a tel.
Best Footballer in Asia chawimawina hi khawvel huapa footballer ṭha ber thlanna, France Football magazine-in a kalpui ṭhin Ballon d’Or kalphunga kalpui a ni a, Asian Football Confederation hnuaia ram tin aiawh journalist ṭheuhten vote an nei.
Ram tin journalist bakah hian European football-a Asian football expert-ten vote an nei ve bawk a, Chhetri hian he chawimawina a dawn hi beiseiawm viau lo mah se playerṭha heti zat zinga a tel pha hi a chhuanawm hle.
Chhetri Sulhnu
Sunil Chhetri hian kuminah hun duhawm tak hmangin India mai ni lo Asia khawmualpui huap thlengin player langsar a ni phak. Bengaluru tan kumin bikah inelna hrang hrangah match 33 khelin goal 22 a khung a, ram tan match ngaah goal riat a khung tawh bawk.
India-in Asian Cup an khelh phak nan Chhetri a thawh hlawk takzet bawk a, hetihrual hian Delhi tlangval erawh chapo takin a ṭawng duh lo a, a ṭhiante vangin India chuan tun dinhmun a thleng niin a sawi.
Chhetri chuan, "Sandesh Jhingan, Gurpreet Singh Sandh, Anirudh Thapa, Jeje leh Udanta Singh te leh player dang vanga Asian Cup khel tur kan ni a, annin hna harsa zawng zawng an thawh laiin kei chu a awlsam lai berah lo dingin goal ka lo khung mai a ni," a ti.
Chhetri elpui
Tarlan tawh angin Sunil Chhetri tan Asia khawmualpuia footballer ṭha ber chawimawina dawn hi thil awlsam a ni dawn lo - Asian player tan chauh a ni lo a, Asia khawmualpuia inkhel player a huam tel vek.
Chhetri nena chawimawina inchuh tur zingah hian Tottenham Hotspur striker Son Heung-min, Al Ain striker leh Sweden international Marcus Berg, Huddersfield midfielder Aaron Mooy, Brighton forward Alireza Jahanbakhsh leh Real Betis attacking midfielder Takashi Inui te chu player langsar zual an ni.
India captain Chhetri hi nikum khan player 25 chhawpchhuah zingah a lo tel tawh a, mahse 25-naah hian a tawp. Kum 2013-a he chawimawina semchhuah hmasak ber ṭum khan Mizo tlangval Lalrindika Ralte hming a lo lang tawh a, East Bengal captain hi a tawp berah a awm.
India leh Chhetri
Sunil Chhetri hian Ningani zan khan India squad nen Asian Cup khel turin Abu Dhabi a thleng a, January 6-ah India hian Thailand nen an match hmasa ber an khel ang.
India hi Group A-ah inelna thlengtu United Arab Emirates, Thailand leh Bahrain nen an awmho dawn a, January 10-ah an match hnihna khelin January 14-ah match thumna Bahrain nen an khel ang - Blue Tigers tan an group awmna hi awlsam tia sawi tur ni lo mah se knockout round luh erawh beisei ngam tur an ni.
Nike nena an thawhhona an tihtawp hnua six5six thawhpuitu India hian jersey thar nen Asian Cup hi an hmachhawn dawn a, player 28 la awm mek zingah Lalruatthara, Lallianzuala Chhangte leh Jeje Lalpekhlua te an la tel a, player hi 23-ah tih hniam leh tur a ni ang.
Best Footballer in Asia 2018 nominee
Hming Club Ram
Akram Afif Al Sadd (Qatar) Qatar
Alireza Beiranvand Persepolis (Iran) Iran
Marcus Berg Al Ain (United Arab Emirates) Sweden
Baghdad Bounedjah Al Sadd (Qatar) Algeria
Sunil Chhetri Bengaluru (India) India
Neil Etheridge Cardiff City (Wales) Philippines
Salman Al Faraj Al Hilal (Saudi Arabia) Saudi Arabia
Makoto Hasebe Eintracht Frankfurt (Germany) Japan
Abdelkarim Hassan Al Sadd (Qatar) Qatar
Hwang Ui-jo Gamba Osaka (Japan) Korea Republic
Takashi Inui Eibar (Spain)/Real Betis (Spain) Japan
Alireza Jahanbakhsh AZ Alkmaar (Netherlands)/ Brighton & Hove Albion (England) Iran
Cho Hyun-woo Daegu (Korea Republic) Korea Republic
Valery Kichin Yenisey (Russia) Kyrgyzstan
Kwoun Sun-tae Kashima Antlers (Japan) Korea Republic
Aaron Mooy Huddersfield Town (England) Australia
Nguyen Quang Hai Hà N?i (Vietnam) Vietnam
Yuya Osako Koln (Germany)/ Werder Bremen (Germany) Japan
Matthew Ryan Brighton & Hove Albion (England) Australia
Serginho America Mineiro (Brazil)/Kashima Antlers (Japan) Brazil
Gen Shoji Kashima Antlers (Japan) Japan
Son Heung-min Tottenham Hotspur (England) Korea Republic
Yuma Suzuki Kashima Antlers (Japan) Japan
Wu Lei Shanghai SIPG (China) China