Liverpool kirna inkhel Merseyside derby

Premier League hmahruaitu Liverpool chu khelmualah kan hmu leh dawn ta. Pathianni zan dar 11:30 hian Everton an lenchilh ang. 

Team hmuhnawm Liverpool lo kirna inkhel Merseyside derby a ni nghal tur hi fans tam tak lawmna siamtu a ni a, entu awm lo mah se a boruak 'hot' na a danglam phah dawn lo. 

Liverpool boss Jurgen Klopp chuan, "Kan phurna leh duhnain thinlung a luah khat a, inkhel turin kan inpeih tawh a ni," tiin a sawi a, Everton tan hriat a nuam lo ang. 

Mahse, Everton leh Liverpool inhuatna thawnthu hlui chhiarin Everton hi an awm mai mai bik lo ang tih a chiang a, an ṭhenawm club champion-na tur ti khawtlaitu nih hi an châk dawn. 

Jurgen Klopp-a'n hnehna a chan chuan record thar a siam thei dawn. Liverpool boss a nih hnua Merseyside derby a hmachhawnah a la tlawm miah lo - Everton vawi 10-a hmachhawn tawhah vawi sarih a chak a, vawi thum a inhnehtawkpui. 

Klopp hian zaninah Reds hi hnehna a chanpui leh a nih chuan Liverpool manager zinga Merseyside derby-a hmachhawn hmasak 11-a tlawm lo record nei hmasa ber a ni dawn a, legend Bob Paisley (10) nena record an inṭawm mek chu a khum ang. 

Mahse, German coach hian a hna a awlsam dawn lo tih a hai lo. Klopp chuan, "Everton khelh dan kan zirchiang a nih chuan Napoli leh team dang khelh dan pawh en tel a ngai. Carlo Ancelotti hian kal dan phung a nei a, chu chu kan hriat vek a ngai a ni," a ti. 

Player enin Everton hi Liverpool aiin an ṭha lo zawk tih a chiang a, mahse European football-a top coach ni phak Ancelotti an neih miau avangin dah hniam bik an harsa. 

Liverpool ṭantute tana thu hriat nuam chu Liverpool player an dam kim hi a ni a, Klopp-a'n a duh ang thalin player a rem thei dawn. German coach chuan, "Tun dinhmunah chuan ka player-te an ṭha vek a, inlan thei lo tur an awm rih lo," a ti. 

Tlarhmaah Mohamed Salah, Roberto Firmino leh Sadio Mane te inkawp kan hmu leh tawh dawn tihna a ni a, Reds ṭantute tan chuan hei ringawt pawh hi chil ti put tham a ni. 

Midfield-a Jordan Henderson thawh­rimna te, Andy Robertson leh Trent Alexander-Arnold ten tlarhnung lam aṭanga goal an nawr tur te, Alisson hmaa Virgil van Dijk a ding tur ringawt te pawh hmu a châkawm leh ta. 

Klopp chuan, "Kan inpeih tawh a, inkhelh kan chak takzet. Chutihrual chuan kan hmaa buaina inchhawp thei hmachhawn tura kan inpeih a ngai. Buaina hi chu a awm reng a, a pawimawh ber chu lo hmachhawn theih hi a ni," a ti. 

Merseyside derby boruak a 'hot' ṭhin a, boruak sang tawh sa belhchhah turin Everton thiampuipa Richarlison chuan ṭawngkam a nei zauh - tun hnaia Liverpool-in European football an ngam theih nana player ṭangkai VVD chu a bum hnu a nih thu a sawi!

Everton forward chuan, "VVD hi an fak vul chuk ringawt! Defender ṭha tak a ni tih chu ka pawm a, mahse ka bum tawh a ni," a ti a, Dutch defender aia Thiago Silva, Marquinhos leh Sergio Ramos-te an ṭhat zawk thu a sawi bawk. 

Richarlison hian tun season inelna hrang hrangah match 31 khelin goal 12 a khung tawh a, VVD nena an inhmachhawn tur hi hmuh a châkawm ta - Liverpool nen an inhmachhawn hmasaka 5-2 a an tlawmna inkhelah Richarlison hian goal a khung. 

Everton hi Theo Walcott, Alex Iwobi, Gylfi Sigurdsson, Andre Gomes leh Dominic Calvert-Lewin te ho an kawl tel tih hriat a ṭha a, Liverpool tan zuam sual theih an ni. 

Everton-in vanduaina pakhat an nei - mahni muala Merseyside derby khelh turah fans puihna an nei thei dawn lo a, coach Ancelotti chuan fans tel lo chuan a hma anga khelh a harsat tur thu a sawi. 

Italian coach ropui hian Goodison Park-a pan hnuah he mualah hian match nga a naute kaihruai tawhin a la tlawm miah lo a, kumina Everton-in point 37 an hlawhchhuah 68% hi chu mahni muala an hlawhchhuah a ni. 

Ancelotti chuan, "Fan-te hi kan player 12-na an ni a, anni thlawpna tel loa khelh chu mual neitu tan chuan a harsa dawn a ni," a ti a, fans ṭawiawmna tel lo chuan inkhelh a ti harsa dawn tih a pha lo. 

Gracenote-in German Bundesliga an zirchianna aṭanga a lan danin German top flight league-ah chuan entu awm loa inkhelh a nihna home match-ah mualneitute team an chakna chu 50% in a tlahniam - Ancelotti chuan, "Premier League-ah pawh hei hi ngaihthah theih a ni lo ang," tiin a fimkhur hle. 

•    Liverpool defender Trent Alexander-Arnold-a'n tun season-ah assist vawi 12 a nei tawh a, season hmasa khan Premier League assist vawi 12 tho neiin defender zinga Premier League-a assist ngah ber record a siam - ama record siam khum thei dinhmunah a ding mek. 

•    Liverpool goalkeeper Alisson Becker-a'n season hmasa khan record siamin match 21-ah clean sheet a nei a, Golden Glove award a dawng. Kuminah hliam vanga a inlan lo nual chungin match 10-ah clean sheet a nei leh der tawh a, Burnley keeper Nick Pope (11) chiah a phak lo mek. 

•    Mohamed Salah-a'n tun season-ah league goal 16 khung tawhin Jamie Vardy (19 goals) leh Pierre-Emerick Aubameyang (17) te chu a la phak lo. Salah hi tun season-ah top scorer a ni leh thei a nih chuan Thierry Henry leh Alan Shearer hnungzuiin Premier League-a season thum chhung a zawna top scorer ni thei record chu a nihrual ang. 

•    James Milner-a'n Everton-a hmachhawn chuan Premier League-a inlan tam lama pangana Gary Speed (535) chu a nihrual chiah ang.