Krismas vuakvetah Aizawl FC inlan dawn

Mizoram Premier League champion thar Aizawl FC chuan December 29, Inrinni tlai dar 2:00-ah Gokulam Kerala an mikhual dawn. Mizo club hian I League-a an result ṭha lo hi MPL an champion hnuah siam ṭhat an tum dawn a ni.

Aizawl FC hian MPL final hmaa I League khel tura an zinchhuah ṭumin Real Kashmir leh Churchill Brothers te an hneh lo a, hemi hnu hian Indian Arrows nen an inhnehtawk avangin tun season-ah match kua an khelh tawhah point ruk chiah an la hlawh chhuak a, an hnuaiah Indian Arrows leh Shillong Lajong chiah an awm.

Mizo club mikhual tur Gokulam Kerala pawh hian season ṭha tak an hmang bik lo a, match riat aṭangin point 10 chiah an hmu a, Aizawl FC chungah chiah an awm. Gift Raikhan-a hoten hnehna an chang thei a nih chuan Kerala club nena an inkar hi an tizim thei dawn a, tlak hlauhawm aṭangin an dinhmun a ziaawm ang.

A dang dawn

Aizawl FC coach Gift Raikhan chuan, "MPL-a kan champion hian nasa takin team chhungah phurna a pe a, player-te pawhin inrintawkna an nei sawt ang. Tunah chuan point thum hmuh tumin theihtawp kan chhuah dawn a, kan chak lo a nih chuan hmabak a harsa dawn. Dinhmun harsa lehzuala awm hi kan duh lo a ni," tiin Vanglaini a hrilh.

A danna tur chhan dang sawiin Gift chuan, "MPL kan khelh avangin I League atan inpuahchahna mumal kan nei thei lo a, tunah chuan kan nei tawh dawn e. Gokulam pual chauhin training kan nei dawn a, hei hi kan game-ah pawh a lan ngei ka ring," a ti.

Aizawl FC hian vawiin thleng hian training an nei ang a, Krismas chawlh an hman hnuah December 27 aṭangin training an zawm leh dawn. Gift chuan, "Player-te hi professional an ni a, ka ringtawk em em a ni. An taksa tana ṭha lo turin an chet duh ka ring lo a, chhungkuaa hlim taka awm a, an rilru ti thawveng turin kan turin ka duh a, tuna an chawlh hi an ṭhatna tur zawk a ni," tiin chawlh an neih chhan sawi.

Mizo an vul

East Bengal chuan Kolkata Derby-a Mizo tlangval R. Laldanmawia hmanga hnehna an chan zawhah Ningani khan Churchill Brothers 2-1 in an hneh a. Hemi ṭum hian captain Lalrindika Ralte a che ṭha hle.

Goan club tan Willis Plaza chuan minute thum lekah a club hlui lamah khung mah se East Bengal-in goal ropui hmangin an chhanglet a, minute 35-naah Didika corner pet thlawk ṭha tak chu Jaime Santos Colado-a'n leia a tlak hmain mawi zetin a volley goal.

Minute 79-naah Didika'n freekick aṭangin chakna goal a khung a, Lunglei tlangval hian Kolkata club a chak pui. East Bengal captain Didika chuan, "Pathian zarah Mizo player-te kan khel ṭha ṭhin a, a lawmawm khawp mai. Derby zawhah hian chak kan harsat em em a, tun ṭuma point thum kan hlawhchhuah hi a hlu hle. Hei point thum hmang hian Krismas pawh nuam takin kan hmang ve thei ang," tiin hnehna an chang vanga a lawm thu Vanglaini a hrilh.

Zanin Inkhel Tur
Chennai City 7:30 PM Real Kashmir
December 23, Pathianni
NEROCA 2:00 PM Minerva Punjab
Mohun Bagan 5:00 PM Shillong Lajong
December 28, Zirtawpni
NEROCA 2:00 PM Mohun Bagan
East Bengal 5:00 PM Real Kashmir
December 29, Inrinni
Aizawl FC 2:00 PM Gokulam
Chennai City 5:00 PM Shillong Lajong
December 30, Pathianni
Indian Arrows 5:00 PM Churchill Brothers
January 4, 2019 - Zirtawpni
NEROCA 2:00 PM Shillong Lajong
Chennai City 7:30 PM Gokulam
January 5, 2019 - Inrinni
Aizawl FC 2:00 PM Indian Arrows
Churchill Brothers 5:00 PM Minerva Punjab
Team Dinhmun
# Team Pld W D L GF GA GD Pts
1 Chennai City 8 5 3 0 16 9 7 18
2 Real Kashmir 8 4 2 2 11 5 6 14
3 NEROCA 8 4 2 2 11 7 4 14
4 Churchill Brothers 8 3 4 1 15 8 7 13
5 East Bengal 7 4 0 3 14 10 4 12
6 Mohun Bagan 8 3 3 2 10 10 0 12
7 Minerva Punjab 9 3 3 3 6 6 0 12
8 Gokulam 8 2 4 2 11 11 0 10
9 Aizawl FC 9 1 3 5 9 15 -6 6
10 Indian Arrows 7 1 1 5 2 12 -10 4
11 Shillong Lajong 8 1 1 6 10 22 -12 4