Barcelona tan zaninah kum tawp kharna
La Liga hmahruaitu Barcelona chuan zanin dar 11:00-ah league match khel turin Celta Vigo an mikhual dawn a, Catalan club tan kumina an inkhel tawp ber tur a ni dawn.
Barcelona elpui Atletico Madrid chu zanin dar 8:45-ah kumin chhunga an match hnuhnung ber ni turin an inlan ve dawn bawk a, Catalan club Espanyol an mikhual ang.
La Liga club lian zingah Real Madrid erawh an inlan dawn lo a, European champion hi UAE-ah Club World Cup khelin an thang mek - zanin dar 10:00-ah Al Ain nen champion nih an inchuh dawn a ni.
Spanish league sang ber hi December 23 thleng khelh tur a ni a, January 4, zing lam dar 2:00-ah Real Madrid chuan Villarreal an lenchilh ang a, hei hi kum 2019-a La Liga match hmasa ber a ni ang.
A awlsam dawn lo
Barcelona hi an hnuaia awm Sevilla leh Atletico Madrid aia an sanna chu point thum chauh a ni a, zaninah hnehna an chang zo lo a nih chuan table chung ber aṭanga tlakna 'chance' a awm.
Celta hian Barca hi rin ai takin an ngam - Catalan club nena La Liga-a an intawn hnuhnung pariatah vawi thum hnehna an chang a, vawi hnih an inhnehtawk. Zaninah Barca tan zuam sual theih an ni ang.
Ernesto Valverde tana lu hai tizual turin Barca damdawi In a lun viau bawk. Right back pahnih Nelson Semedo leh Sergi Roberto an inhliam mek a, tlarhnung laiah Samuel Umtiti inhliam mekin Thomas Vermaelen chu Levante lakah inlan mah se hliam vanga lakchhuah a ni bawk.
Atleti tan hun ṭha
Diego Simeone-a nauten zaninah Barca nih rualna remchang an nei dawn. Catalan club inlan hmain Espanyol an mikhual dawn a, hnehna an chang a nih chuan an hnung lama inkhel tur Barca nen an point hmuh zat a in ang ang a, pressure nei chungin Atletico an inlan ang.
Hriat tel atana ṭha erawh Atletico leh Espanyol hi an in intawn hnuhnung vawi liah Espanyol hi vawi hnih an chak a, vawi khat an inhnehtawk a, Atletico-in vawi khat chiah hnehna an chang ve.
Atletico striker Diego Costa chu hliam vangin a inlan theih a la rinawm lo a, Lucas Hernandez leh Jose Maria Gimenez inlan a beiseiawm lo bawk.