Stamford Bridge zawh tur Arsenal

Chelsea dinhmun tur a chiang thawkhat tawh - Thomas Tuchel-a naute hi Premier League-ah pathumna an ni ang. Arsenal erawh an dinhmun a la chiang lo, Champions League beiseitu hi European football rim pawh hre phak loin an la awm daih thei a ni.

Mikel Arteta naute hian zanin dar 12:15 hian Chelsea hmachhawn turin Stamford Bridge an tlawh dawn, an chak a nih chuan palina ni phak turin beisei an nei thar ang, an chak lo a nih erawh chuan thawhchhuah a harsa tawh khawp ang.

Gunners hian kar tawpah Manchester United an mikhual zui dawn a, player hliam vanga buai North London club hmabak a hautak dawn, chumi hnuah West Ham nen London Derby an la hmabak bawk.

Insiksawi a ngai
Chelsea hian tun season inelna hrang hrangah match 54 an khel tawh - May thla maiah EPL a tawp tawh dawn, tunah hian league match pariat bakah FA Cup final khelh hmabak an la nei bawk a ni.

Player chhawr rimte chu an chau tawh ang tih a chiang, chuvangin Tuchel-a'n a player neih ang ang a siksawi kual ṭhin, zaninah pawh player ṭhenkhat a siksawi leh ngei ang, striker Romelu Lukaku chu bul ṭan thei zinga mi a ni dawn.

Lukaku hian season tir lam khan a tha chakna hmangin Gunners tlarhnung a lo su darh tawh, zaninah bul a ṭan a nih chuan Kai Havertz a hahchawl ve thei ang. Tun hnaia khel ṭha leh hmuhnawm Mason Mount erawh dah chhuah a harsa ang.

Tuchel chuan, "Inkhelah player zawng zawng an pawimawh, a bik takin striker tan minute khat lek pawh a pawimawh zual. Sang tak leh hniam taka awm theihna inkar hi a zim hle," a ti a, striker Lukaku leh Timo Werner te tan kawng a la hawnsak reng tih a sawi.

Inkhel pawimawhah chuan Thiago Silva hmaih a thiang lo. FA Cup-ah khan hun tawp dawn lamah a lut chauh a, zaninah erawh Andreas Christensen leh Antonio Rudiger te nen an inkawp a rinawm, striker hriam nei lo Arsenal tan paltlang an harsa dawn.

Vawi thum chak lo
Crystal Palace, Brighton leh Southampton an hmachhawn dawn khan, harsa lutuk loin point ruk tal an hmuh kha Arsenal ṭantute beiseina a ni, mahse, an khel zo a, point khat mah an hmu lo, inkhel pathumah an tlawm vek.

An elpui Tottenham an chesual ve hlauh a, chuvangin Arteta naute tan beiseina a la awm ve mai nia sawi theih a ni. Zaninah an tlawm leh a nih ngat chuan UCL beiseina a thamral zui ang, an tan point khat chauh hmuh pawh a hlu dawn.

Stamford Bridge aṭanga point sual chhuak turin Arsenal hian player an nei em, tih chu zawhna lian tak a ni. Inkhel bul ṭan tur leh bench lama ṭhu tur chu an nei ngei mai, an zingah goal khung thei tur an awm tia sawi huai erawh a harsa.

Match hnuhnung berah Alexandre Lacazette chu damlohna vangin a khel lo a, tun season-a league goal la khung lo Eddie Nketiah a lut. Anni pahnih zingah hian duh thlan tur zawk awm lo khawpa goal khung harsat an ni.

Mual sirah Bukayo Saka leh Gabriel Martinelli ten dinhmun pawimawh an luah dawn, anni pahnih hi Emile Smith Rowe leh Martin Odegaard ten an thlawp fuh bawk a nih chuan Blues tlarhnung tan ngaihṭha taka awm ngawt erawh a harsa ang.

Tlarhnung buaina
Hliam vangin Takehiro Tomiyasu leh Kieran Tierney an inkhel thei lo a, tlarhnung lai thlawp ṭhintu Thomas Partey a chawl mek bawk - Tierney leh Partey te hi tun season chhungin an hmel kan hmuh a rinawm tawh lo bawk.

Arteta-a'n tlarhnung a siksawi kual ṭhin a, tun thlengin a la fuh thei lo. Ben White leh Gabriel te khel pangngai viau mah se a sir a phui rih lo a, keeper Aaron Ramsdale-a'n target zawna shot vawi 14 a hmachhawn zinga pariat a chhuah bawk avangin tlarhnung buaina hi mi pakhata chinfel mai theih a ni lo.

Cedric Soares leh Nuno Tavares ten rin nawn an hlawh a nih chuan, Chelsea hmatawng Mount, Werner leh Christian Pulisic te an hmachhawn a ngai dawn tihna a ni a, vawi khat tihsual neih zeuh pawha hrem let nghal thei tur an ni hlawm.

Arsenal tlarhnung an buai laiin Chelsea erawhin duhthlan tur an ngah. A lai pathum an nghet ṭha tawk a, mual sira tlan thiam Marcos Alonso a rintlak bakah Reece James-a hliam a dam fel tawh, English wing back hi a venghim tur bakah goal nawr turin a ṭangkai leh ang.

Blues midfielder Mateo Kovacic erawh Palace an hneh ṭumin a inhliam, Croatia international awm lo mah se N'Golo Kante leh Ruben Loftus-Cheek te kianga khel turin Jorginho an la nei tho. Tuchel-a naute an ṭha tawk, point mamawh Arsenal tan thapui thawh a ngai dawn.