Man City hmaah Brighton

Manchester City chuan zanin dar 12:30 hian Etihad Stadium-ah Brighton & Hove Albion an mikhual dawn. Pep Guardiola hote tan Premier League champion ni turin point hloh a thiang tawh lo. Nizan khan Liverpool-in Anfield-ah Cristiano Ronaldo tel lohna Manchester United an mikhual a, Jurgen Klopp-a hote hian hnehna an chang a nih chuan pakhatna dinhmun an luah dawn.

Man City hian nikum October 23 khan Brighton hi Amex Stadium-ah 4-1 in an sawp a, tun ṭumah hian Etihad Stadium-a khelh tur ni bawk mah se tun hnaia Seagulls an chet ṭhat avangin chetsual theihna a ni. Brighton hian an match hnuhnung berah Tottenham Hotspur chu khualmualah 1-0 in an hneh a, hemi hma hian Emirates Stadium-ah Arsenal 2-1 in an hneh bawk.

Brighton manager Graham Potter chuan, "Manchester City anga team ṭha hi chu engtik lai pawhin khelh an harsa. Liverpool nena ṭum hnih an inkhelh karah Atletico Madrid nen an inkhel a, FA Cup semifinal-ah halftime-ah 3-0 a ni chungin second half-ah goal hnih an la chhanglet thei. Mi ṭhahnem tak hi chuan nomawi an chawi aṭangin coach an teh ṭhin a, coach thlirna aṭang chuan Pep-a hnathawh hi a ropui a ni," tiin a khingpui manager Pep Guardiola a dah sang hle.

Man City hi Seagulls nena league match-a an intawn hnuhnung pakuaah vawi riat an chak a, Brighton hi vawi khat an chak. Pep Guardiola hoten goal 27 an khung laiin Brighton-in goal ruk chauh an khung a, team pahnih inthlauhzia a lang. Chutihrualin minute 90 chhung chuan vanneih theih a ni a, Liverpool ṭantuten Brighton hi an vanneih an beisei ang.

FA Cup-ah Pep-a'n keeper Ederson, Ruben Dias leh Aymeric Laporte te a chhawr lo a, Brighton lakah bul an ṭan ang. Tlarhma lamah Rodri, Riyad Mahrez leh Kevin De Bruyne te an inlan a rinawm bawk. Man City-in tun hnaiah match ngah deuh mah se squad a chhah ṭhat avangin Seagulls lakah an match khelh tam hi an buai phah a rinawm loh.