Man United manager thar tur Ten Hag

Manchester United chuan manager nghet ni turin Erik ten Hag an lalut dawn a, vawiin lamah official-a an puan beisei a ni. Transfer lama journalist rintlak Fabrizio Romano chuan Dutch manager-in Old Trafford a pan tur thu hi a tichiang tawh.

Ten Hag hian June 2023 thleng Ajax-ah contract a nei a, Man United hian Dutch manager lakchhuah nan euro maktduai hnih an sen a ṭul phah dawn a, hemi chungchangah hian Dutch club leh English club te hi an la inbe mek.

Kum 52 mi Ten Hag hian Ajax-a amah puitu Mitchell van der Gaag chu assistant manager atan chhawr zui a duh a, Man United hian Van der Gaag hi an dawr chhunzawm ang.

Tu nge Ten Hag?
Erik ten Hag hi February 2, 1970 khan Haaksbergen, Netherlands-ah a piang a, 5ft 11in-a sang niin player vantlang a ni. Ten Hag hi a inkhelh hun laiin centre back a ni a, FC Twente tana khelh laiin kum 2001 khan Dutch Cup a chawi a, Netherlands tan erawh a khel pha lo.

Ten Hag hian a inkhelh hun lai aiin team enkawl hna a chelh hnuah hming a chher zawk. Kum 2012 khan Eerste Divisie club Go Ahead Eagles chu a enkawl a, kum 17 hnua a vawi khat nan Eredivisie-ah a kaipui.

Dutch manager hian Bayern Munich II a enkawl zui a, Bayern reserve team hi June 2013 aṭanga 2015 thleng enkawlin Regionalliga Bayern-ah a champion pui.

Kum 2015 aṭangin FC Utrecht-ah sporting director leh head coach hna a chelh kawp a, season khatnaah pangana nihpuiin season hnihnaah palina a nihpui leh bawk.

Ten Hag-a'n hming a chher tak takna erawh Ajax a ni a, December 21, 2017 aṭangin Ajax hi enkawl ṭanin Eredivisie leh Dutch Cup-ah vawi hnih ve ve a champion pui a, tun season hian Eredivisie-ah a vawi thum nan champion a beisei leh mek.

A khelhtir dan
Ten Hag hi Pep Guardiola ngaisangtu a ni a, Ajax pawhin ball possession an ngah ṭhin bakah player awmna hmun a ngai pawimawh hle.

Dutch manager Ten Hag chuan, "Guardiola aṭangin thil tam tak ka zir. Barcelona, Bayern leh tuna Man City tana a hnathawh hi a ropui. Inkhel hmuhnawm tak khel chungin attacking football a khel a, a chakpui tam bawk," tiin Spanish manager a ngaihsan thu hi a lo sawi tawh.

Ten Hag hian Germany-ah hna a thawh tawh avangin tlarhma aṭanga 'pressing' a ngai pawimawh. Ajax legend Johan Cyruff ngaisangtu a nih angin Ten Hag hian Dutch legend hnu chhuiin attacking football a khel nasa hle.

Engtin zel?
Ajax manager Ten Hag hian a tactic pawh awmze nei takin a thlak danglam thiam a, Dutch club-ah pawh false nine atan Dusan Tadic a hman thiam rualin striker Sebastian Haller pawh awmze nei takin a chhawr thei bawk.

Dutch manager hian chanchin ngaihnawm a ngah rualin pressure tamna zawk club lian a la enkawl lo a, league sang zawkah tawnhriat a nei lo a, player hrawn harsa a la kaihruai lo bawk. Man United talbuai lai takin Ten Hag-a'n Old Trafford a pan dawn a, manager tana harsa tur ang zawng zawng chu a awm kim viau ang.

Ten Hag hian hlawhtlinna chang turin a khelh duh dana khel thei player a mamawh dawn a, hemi a nih avang hian Man United pawhin Dutch manager chungah dawhtheihna an lantir a ṭul dawn. Chutiang bawkin Ten Hag hian a hmaa inchhawp player-te thiam taka a hman thiam a ngai dawn a, manager langsar zawk Jose Mourinho leh Louis van Gaal te hlawhchhamna hmunah Dutch manager hi fiahin a awm ang.