Harhna chang (?) Barcelona an tlawm!

Barcelona harhtharna chan a la chiang tawk lo - Thawhṭanni zan khan table mawng lama awm Cadiz lakah 1-0 in an tlawm a, an inkhelhna hmun hi Nou Camp a ni!

Cadiz tan Lucas Perez chuan inkhela goal awmchhun hi minute 48-naah a khung a, Arsenal striker hlui goal khung hmangin mikhual team an chak.

Catalan club an tlawm avangin hmahruaitu Real Madrid chu point 15 zetin an thlau ta a, match khatin khel tlem zawk mah se Xavi leh a naute tan champion beisei chu vana rah ang a ni tawh.

Real Madrid hi zanin dar 1:00-ah an inlan zui dawn a, Osasuna khelmualah an leng ang - an chak chuan Barca aia match hniha khel tamin, point 18-in an sang fal tawh dawn tihna a ni.

Beisei phak lo
Barcelona-in inkhel an thunun a, mahse, inkhela pawimawh ber goal an khung thei lo - first half-a chance duhawm ber chu Cadiz neih a ni a, Perez chuan hnai set sawt aṭangin uiawm takin a hlah.

Second half-ah erawh Perez-a'n a chance a hlah tawh lo. Second half ṭan aṭanga minute thumnaah Ruben Sobrino-a shot chu Marc-Andre ter Stegen chuan a dang per a, Perez-a ke bulah tak a tla.

Kum 33 mi striker hian hnai set sawt aṭangin a lo pet goal a, Cadiz-in chak nan an hmang zui. Barca boss Xavi-a'n chak ngei a duh a, bench aṭangin Pierre-Emerick Aubameyang leh Adama Traore a luhtir.

Mahse, January transfer-a Barcelona pantu forward pahnih hian an team tan goal an hlawh chhuak thei bik lo a, an mikhual team lakah 1-0 in an tlawm.

Match hnih
Barcelona tan an match hnuhnung pahnih chu theihnghilh tlak a ni a, fan-ten an ngai lo khawp ang - kar hmasa tawp lam khan Europa League quarterfinal aṭangin an tla a, Eintracht Frankfurt chu 3-2 in an ngam lo.

Frankfurt hi inkhel pahnih belhkhawmah 4-3 in an ngam lo a, Europa League an mangṭha. Barca fan-ten La Liga-ah an rilru na thawi dam an beisei a, mahse, a belhchhahtu mai a chang leh ta.

Catalan club hian December 4-a Real Betis an ngam loh hnu khan league-ah tlawm an nei leh tawh lo a, match 15 chhung chu an kaltluang hman - mahse, Cadiz lakah tlawmin an hun duhawm hman chu tihtawpin a awm ta.

Barca tan tun season hi theihnghilh tlak a ni - Copa del Rey-ah round of 16-ah an tla a, Spanish Super Cup semifinal-ah an tlawm a, Champions League group stage aṭanga an tlak avangin Europa League an khel a, quarterfinal-ah an tla a, La Liga nomawi an mangṭha chiang leh taah a ngaih theih bawk.

Mangṭha La Liga
Barcelona hian tun thlatir khan an elpui Sevilla chu Nou Camp-ah 1-0 in an hneh a, inkhelah zawhah Catalan club coach Xavi-a'n an tan nomawi beiseina a la thih loh thu a sawi.

Mahse, beisei angin thil a kal vek bik lo - Cadiz lakah rin loh takin Barca an tlawm a, Spanish manager ṭawng thluk pawh a dang ve leh ta. Xavi chuan, "Kan lawm lo a, Champions League team-te laka kan danglamna tih lan hun kan bawhpelh.

"Tunah chuan league pawh kan mangṭha ta," tiin La Liga nomawi a thlah fel der - a awm lo hran lo. Thil mak beiseitu tan lo chuan beisei chi a ni tawh lo!

Xavi chuan sawi zawmin, "Ka thin a rim a, kha aia chak duha tuihal zawk tur kan ni. Kha aia tam zawk kha thil ti tur kan ni a, heng hun atan hian kan train a, a mawhphurtu ber erawh keimah ka ni - kha aia ṭha zawka khel tur kan ni," a ti a, a lungawi lo hle.