RVL leh Luangmual an chak

Ramhlun Venglai leh Luangmual ten nimin khan Mapuia Memorial Mizoram Cricket League-ah hnehna an chang a, semifinal khel turin an dinhmun an siam ṭha zel.

Suaka Criket Ground, Sihhmuia inkhel hmasa zawkah Luangmual hian Kulikawn chu wicket liin an hneh, wicket thum a lak bakah 25 runs siamtu G. Lalbiakvela chu Player of the Match a ni a, 47 runs siamtu Lalrempuia a che ṭha bawk.

Luangmual hian match nga aṭanga point nga hmuin pathumna an ni a, an match hmasa berah Chhinga Veng hnehna remchang tak an neih laia khuain a bumro kha an la ui zel ang, tunah erawh semifinal khel thei chinah an awm.

Match hnuhnung zawkah, inelna lian hnuhnung pahniha champion Ramhlun Venglai chuan wicket ngain Bawngkawn South an hneh a, point riat hmuin hmahruaitu Chanmarians nen an point a inzat, match khatin an khel hnem thung.

RVL hian vawiinah Kulikawn an hmachhaawn leh dawn, match nga aṭanga vawi hnih chauh hnehna la chang Kulikawn tan fimkhur a ngai dawn, a ni zawna an chak lo a nih chuan semifinal khel loh mai a hlauhawm thei dawn.

Hmahruaitu Chanmarians hmaah Chhinga Veng an ding dawn. 3C hi tunah a hniam ber dawt an ni, chak la nei lo Bawngkawn South chiah an hnuaiah an awm. Team ṭha, an khingpui apiang la hneh vek Chanmarians laka hnehna chang tur chuan K. Vanlalruata chungah mawhphurhna a sang hle ang.

Cricket Association of Mizoram hnuaia inelna lianah hian tualchhung team ṭha pali - RVL, Chanmarians, Kulikawn leh 3C bakah hmun ruak leitu Luangmual leh Bawngkawn South te an inel. An inkhelh kual vek hnuah a sang paliin semifinal an khel dawn a ni.

Vawiin Inkhel Tur
Chhinga Veng 09:00 AM Chanmarians
Kulikawn 01:00 PM Ramhlun Venglai

Nimin Inkhel Results
Luangmual 108/6 (19.5 Ov)
bt
Kulikawn 104/9 (20.0 Ov)
Luangmual hi wicket liin an chak
Toss: Luangmual lamin vawm hmasak an thlang
PoM: G. Lalbiakvela, Luangmual
Ramhlun Venglai 103/5 (19.4 Ov)
bt
Bawngkawn South 102/10 (18.2 Ov)
Ramhlun Venglai hi wicket ngain an chak
Toss: Bawngkawn South lamin vuak hmasak an thlang
PoM: Johan Lalbiakkima, Ramhlun Venglai