Rooney-a'n Derby a chhan thei lo

Thawhṭanni zan khan Derby County chuan Queens Park Rangers chu 1-0 in an hneh lo a, Wayne Rooney kaihhruai Rams hi Championship aṭangin an tla.

Loftus Road-a inkhelah QPR tan Luke Amos-a'n minute 88-naah chakna goal a khung a, Derby-in a chhanletna tur an neih loh bakah injury time-ah Derby midfielder Tom Lawrence chu hnawhchhuah a ni.

Rams hian match 43 aṭangin point 31 an hmu a, a him china awm Reading (41 points) an umphak theih tawh loh avangin an relegate. Derby hi club sum dinhmun fel loh avangin point 21 ngawt paihsak an ni a, transfer-a player ṭha lakna tur sum an neih loh bawk avangin Rooney pawhin a chhan thei lo.

England leh Manchester United forward hlui Wayne Rooney chuan, "Club neitu hlui Mel Morris pawh a mut ṭhat theih loh ngei ka beisei. Derby ṭantu ni mah se club dinhmun chhe taka dahin a chhuahsan a, a chenna in lamah hrehawm titakin a awm ve ngei ka ring," tiin a sawi.

Derby hi administration-a dah avangin point 12 an paihsak a, table-a 12-na aṭangin table mawngphahah an tla thla. Amaherawhchu EFL accounting rules an bawhchhiat avangin point kua an paihsak leh a, an inham tang thei ta lo.

Rooney chuan, "A êng zawnga thlir chuan kan point hmuh zat hi Championship khelh chhunzawm nan a tawk. Player naupang zawk leh khawtual player ṭha tak tak kan chher chhuak a, club hian hmabak êng tak a nei. Chutihrualin kan inham tang thei lo hi pawi ka ti a, hrehawm ka ti a, mah se kan hnathawh erawh ka chhuang," tiin a sawi.

Championship aṭangin team pahnihin Premier League an tling nghal dawn a, Fulham leh AFC Bournemouth te dinhmun a ṭha. Hmun ruak pakhat hi pathumna aṭanga parukna ten playoff hmangin an zawng dawn a; Huddersfield Town, Luton Town, Nottingham Forest leh Sheffield United te parukna chinah awm mah se Millwall, Blackburn Rovers, Middlesbrough leh QPR te pawhin playoff khelh beiseina an la nei a ni.